City leh Newcastle an intawng dawn

League Cup third round-a intawng turte a chiang ta a, treble champion Manchester City chuan Newcastle United an hmachhawn nghal dawn - a hmuhnawm ang.

Hetihlai hian champion lai Manchester United chuan Old Trafford-ah Crystal Palace an mikhual dawn a, a awlsam bik dawn lo. Premier League club inhmachhawn tur zingah Aston Villa chuan Everton an mikhual dawn a, Brentford-in Arsenal an hmachhawn dawn thung.

Tun hnai transfer bazar vel vanga team pahnih inkar boruak nei Brighton & Hove Albion leh Chelsea intawng tur pawh hmuh a châkawm viau - Brighton hi Stamford Bridge-ah an leng ang.

Vawi kua champion a, League Cup champion ngun ber record chelhtu Liverpool chuan Championship lama tla tawh Leicester City an mikhual dawn a, Tottenham Hotspur pet chhuaktu Fulham chuan Championship club Norwich City an mikhual dawn bawk.

League Cup-ah hian first round chu Championship, League One leh League Two club-ten khelin, second round-ah Premier League club 12, European football khel loten an lo zawm ve leh ṭhin.

Third round aṭangin European football-a inlan Premier League club pariatten inelna an hmachhawn ve leh ṭhin a, second round-a hnehna chang team-te nen fourth round luh an inchuh leh dawn a ni.

Ruahman dan chuan third round hi September thla tawp lamah khelh tur a ni a, February 25, 20224-ah final khelh a ni ang.