Messi-a'n goal a khung lo

Lionel Messi tan pawh goal khung reng theih a ni bik lo a, a team Inter Miami chu chakpui reng theih pawh a ni chuang lo. Nimin zing Major League Soccer (MLS) inkhelah Miami hi Nashville SC nen 0-0 in an inhnehtawk.

July thla khan Inter Miami hian Messi an chhawr ṭan, a hmain match 11 chhung chak ni hmel hmu loin an awm. Messi awm chinah erawh engkim a danglam a, tun ṭum hi an chak zawh loh vawi khatna a ni hial.

Kum 36 mi Messi hian goal khung tumin vawi sarih ngawt a shot a, mahse a vanneih ṭum a ni lo. Match kua aṭanga goal 11 a khung tawh chu a belhchhah thei rih lo a, ni danga an hlimna ang an phak ta rih lo a ni.

Eastern Conference table-ah Inter Miami hi 14-na an ni mek, match 24 aṭangin point 22 an hmu - season bul an ṭan chhiat em avangin an dinhmun siamrem turin hun an mamawh rei deuh dawn niin a lang.

Chutihrualin, MLS club leh Mexican club te inelna Leagues Cup-ah a champion tawh a, an club tana nomawi hmasa ber a ni. US Open Cup lamah final an lut tawh bawk, nomawi pahnihna chawi turin match khat chak an la hmabak.