British GP dinhmun a chiang lo

United Kingdom inkaihhruaina danah chuan an rama khualzin lutte chu ni 14 chhung khung hran vek tur an ni. He inkaihhruaina dan hian infiamna khawvel a huam vek a, ngaihhnathiamna pek an nih loh chuan Formula 1 British Grand Prix an neih theih a rinawm lo.

Hripui Covid-19 vangin khawvel a buai mek, car intlansiakna sang ber Formula 1 pawh March thla khan tlan ṭan tur ni mah se tun thlengin an la tlan thei lo. July 5 hian Austrian Grand Prix chu a hmuna entu awm loin tlan an tum.

Tun season intlansiak neih hmasak tur 10 chu a hun pangngaiah kalpui theih a ni ta lo a, heng zinga pahnih phei chu kumin atan ṭhulh fel a ni tawh. Hun harsa tak karah British GP an tlanna Silverstone tlan kawng chuan inelna pahnih thleng thei tura beisei a ni.

Mahse, UK-ah hri vei an tam a, inkaihhruaina dan khauh tak an nei. F1 thuneitu lam chuan inelna neih hma ni 14 chhung inkhung hran hmasak a ngai a nih chuan an tan harsatna a tam tur thu an sawi ve thung.

F1 thupuangtu, a hming tarlan loh chuan, "Ni 14 inkhung hran hnua British Grand Prix tlan chauh chu kumin atan a tih ngaihna a awm lo. Team tam zawk hi Britain hmuna hmunpui nei ni mah se a nei ve lo team dang tan a harsa a ni," tiin a sawi.

Formula 1-ah hian team 10 an inel ṭhin a, chung zinga pasarih lai chu Britain behchhana din an ni. Team hlun leh ṭha Ferrari erawh hri len nasatna hmun Italy-a hmunpui nei an ni thung, an tan ram danga ni 14 va inkhunghran kha thil awlsam a ni bik lo ang tih a chiang.