Becker-a'n Serena a dah sang

German tennis legend Boris Becker chuan Serena Williams a dah sang hle a, American star hi tun hnaiah hlawhtling hleithei lo mah se Margaret Court-i record chu engtik niah emaw chuan a la nih rual ngei a beisei.

Grand Slam vawi 23 champion tawh Serena hian record nei ṭha ber Margaret Court (24 titles) nih rual turin nomawi lian tham pakhat chawi bak a mamawh tawh lo, mahse major tournament final a khelh hnuhnung pathumah erawh a chak lo vek.

Serena hi kum 38 mi a ni tawh a, fa a nei tawh bawk. A kum a tam bakah nu a nih tawh avangin a vanglai a phak tawh lo tih chu a chiang a, mi tam tak chuan Grand Slam nomawi a chawi leh theih pawh an beiseipui tawh meuh lo.

World number 1 hlui Becker chuan, "Serena hma hun leh a record chungchangah hian zawhna leh inhnialna a tam, kei chuan record ṭha ber a chelh theih ka ring. Kuminah hian US Open leh French Open an khel thei a nih chuan hlawhtlinna a chan ngei pawh ka beiseipui.

"Serena ka fak avang hian player naupang leh chhuak thar ho ka ngainep tihna erawh a ni lo. Theihna nei sang tak tak zingah hian hlawhtling tur chuan tawnhriat neih hnem a pawimawh, chutiang tur chuan Serena hi kawng engkimah a tling tawk vek a ni," tiin a sawi.

Covid-19 vangin Wimbledon chu Indopui II-na hnua a vawi khat nan kuminah an khel thei dawn lo. May thlaa khelh tur French Open chu September thla atan an sawn tawh, August thla tawpah hian US Open chu New York khawpuiah khelh theih an la beisei reng thung.