Arsenal mualah Man United

Chawlhkar tawp a thleng leh ta - Premier League inkhel hmuhnawm a la awm dawn zui, a hun lah chu Pathianni zan inkhawm ban a ni dawn leh nghal, dar 9:00-ah Arsenal chuan Manchester United an lo mikhual ang.

Team pahnih hi champion tum ngam ve ve an ni a, elpuite lak aṭanga point hlawh chhuah hlut bikzia pawh an hrechiang. A chak lo zawk fans tan Thawhṭannia hnathawk tura chhuah pawh a hrehawm leh dawn, chuvangin chak zawk nih a pawimawh takzet.

Varane tel lohna

Manchester United chuan an defender rinrawl Raphael Varane an chhawr thei dawn lo. France international hlui hi hliam vangin Emirates Stadium-ah a inkhel ve thei dawn lo a, defender Luke Shaw a hliam mek bawk.

Shaw aiah Diogo Dalot a hman theih ang a, a laiah pawh Victor Lindelof leh Lisandro Martinez ta an la neih tho avangin an buai vak lo tura ngaih a ni. Coach Erik ten Hag-a'n a duh a nih phawt chuan Harry Maguire pawh inkhel turin a inpeih.

Man United hi an tlarhnung a la phui ṭha tawk lo - Tottenham laka an mualpho hnuah Nottingham Forest lakah pawh goal hnih an chhuah. Arsenal khelmuala goal chhuah lo tur chuan fimkhur an ngai khawp ang, defender ho bakah Casemiro a pawimawh ang.

Tlarhnung chauh hi United buaina a ni lo, striker Rasmus Hojlund chu hnungzâng na vangin an la chhawr miah lo. Chelsea aṭang an lak thar Mason Mount a inhliam bawk - an ṭhat dan ber turin tun season kal laiah an la khel lo tihna a ni.

Marcus Rashford chu tlarhma laia tlan turin a nem deuh a, hliam damkawr Anthony Martial a din leh zawk a rinawm. Jadon Sancho leh player man tam Antony an la neih bawk avangin an khelh fuh ni chuan Gunners tlarhnung ṭhiat turin an ṭha tawk.

Jesus a dam

Gabriel Jesus a dam tawh a, an match hnuhnunga Fulham nen an inkhelh ṭumin hun tawp dawnah a lut thei tawh. Defender Oleksandr Zinchenko pawh bul ṭan turin a inpeih tawh, coach Mikel Arteta-a'n a duh ang takin a naute a rem thei dawn tawh niin a lang.

Spanish manager hian player a siksawi kual nasa hle a, ṭhatna lai a awm rualin Fulham laka point hnih an hloh chhan erawh a naute a rem dan fuh tawk lo vangah a puh theih bawk - Manchester United lakah chuan thutlukna siam sual a rem tawh dawn lo.

Declan Rice-a'n a hna a thawk ṭha nghal a, forward Kai Havertz erawh EPL match pathum a khelh tawh chinah beisei a la phak lo - Germany international hi engtiang taka chhawr tur nge hriatthiam a la harsa, tunah chuan Granit Xhaka hmun ruak a la zau rih hle.

Mak tak mai chu season hmasa league match khel vektu Gabriel-a'n tun season bikah bul a la ṭan miah lo. Brazilian defender hi chhuak tur angin thawm a awm a, a chhuah dawn vanga khel lo a ni em, tih hriat a ni lo - Jurrien Timber leh Zincheko te hliam vang a ni thei bawk.

Arteta-a'n inverted full back a hmang ṭhin a, hemia khel thei Timber leh Zinchenko an hliam, hei vang hian Thomas Partey a khelhtir ṭhin. Tunah chuan Zinchenko a dam tawh a, a duh ang takin Gabriel pawh a hmang thei tawhin a rinawm bawk a ni.