Asian Games khel tur Remsiami

India rama hockey thuneitu sang ber Hockey India chuan Asian Games khel tur player a tarchhuak a, hmeichhe team player 18 thlan chhuah zingah Mizo nula Lalremsiami Hmar a tel.

Ningani khan Hockey India chuan Bengaluru-ah Asian Games khel turte pual hian hun a buatsaih. Kolasib nula Remsiami hi a nu Lalzarmawii leh Kolasib MJA president Andrew Vanlalauva ten a hmunah an ṭawiawm a ni.

Remsiami telna India team hian Asian Games 2018-ah khan silver medal an lo la tawh a, tun ṭumah pawh hian an chesual hle a nih loh chuan medal lak phak an beisei ngamin a rinawm.

India hi Pool A-ah South Korea, Malaysia, Hong Kong leh Singapore te nen an awm. Pool B lamah champion lai Japan, a thlengtu China, Thailand, Kazakhstan leh Indonesia te nen an awmkhawm thung a ni.

Thenzawl Hockey Training Center aṭang inzir chhuak Remsiami chuan, "Theihtawp kan chhuah dawn, India tan kan theihna zawng zawngin kan bei dawn a ni. A bik takin Mizoram tan pawh a ni a, Pathian hruaina min dilpui vek turin Mizo mipuite ka sawm," tiin Vanglaini a hrilh.

Asian Games 2023 hi September 23 aṭanga October 8 chhung hian China rama an khawpui pakhat Hangzhou-ah neih a ni dawn a, Asia khawmualpui aṭangin infiammi a ṭha thlan khawmten inelna an nei dawn a ni.

India Squad:

Goalkeeper: Savita Punia (captain), Bichu Devi Kharibam.

Defender: Deepika Thakur, Monika Malik, Nisha Warsi, Ishika Chaudhary, Deep Grace Ekka (vice captain), Sushila Chanu.

Midfielder: Neha Goyal, Sonika Tandi, Udita Duhan, Vaishnavi Vittal Phalke, Nikki Pradhan, Salima Tete.

Forward: Lalremsiami Hmar, Navneet Kaur, Vandana Katariya, Sangita Kumari.