Haaland aia thiam an awm lo

European football-a thuneitu sang ber UEFA chuan Player of the Year atan Erling Haaland an thlang a, Manchester City forward hian he award dawng tur hian City tana a khelhpui Kevin De Bruyne leh Inter Miami forward Lionel Messi te a khum a ni.

Kum 23 mi Haaland tan season liam ta kha kum ṭha bik a ni - FA Cup, Premier League leh Champions League-ah City tan champion nomawi a chawi a, Premier League Player of the Season leh Young Player of the Season-ah thlan a ni a, FWA leh PFA Players' Player of the Year-ah thlan a ni bawk.

Haaland sulhnu

Norwegian striker hian season hman zawh takah khan inelna hrang hrangah match 53 khelin goal 52 a khung a, Premier League match 35-a khelhah goal 36 khungin record a siam a, assist vawi riat a nei - hattrick vawi li a siam.

Haaland hian Champions League match 11-ah goal 12 a khung bawk a, amah hnaih bertu Liverpool forward Mohamed Salah aiin goal liin a khung tam zawk. Champions League match khata goal nga khung thei zingah a hming a nem kai bawk.

Messi aiah Haaland

Haaland hian European football-a player ṭha ber ni tur hian point 352 a hmu a, amah hnaih bertu Lionel Messi chuan point 227 a hmung thung - KDB chu pathumna niin, point 225 a hmu. UEFA Awards-a mimal chawimawina sang dawngtute hi UEFA technical study group chuan thlan tur an chhawp chhuak.

Season hman zawh taka Champions League, Europa League, Europa Conference League group stage khel club leh UEFA hnuaia ram 55 coach te bakah European Sports Media (ESM) in a thlan bik journalist ten player pathum ṭheuh thlang chhuakin, player-te chu point nga, point thum leh point khat an pe a, player-te point hmuh zat belhkhawma a sang ber chu thlan an ni.