Europe-a coach ṭha ber Pep

Manchester City boss Pep Guardiola chu UEFA Men's Coach of the Year atan thlan a ni a, season hman zawh taka City treble champion puitu hian Inter Milan boss Simone Inzaghi leh Napoli manager Luciano Spalletti te khumin he award hi a dawng a ni.

Inzaghi hian Coppa Italia-ah Inter Milan chu nomawi chawipuiin, Champions League semifinal a luhpui a, Spalletti hian Napoli chu kum 33 hnua a vawi khat nan Serie A nomawi a chawipui bawk.

Mahse, Pep hian City hi Premier League, FA Cup leh Champions League-ah te nomawi a chawipui a, inelna hrang hrangah goal 151 zet an khung - season hman zawh taka match tina an ball chan zat chawhrual chu 63.6% a tling hial a, a buk a rit ta ber a ni.

Spanish coach hian City-ah nomawi 13 zet chawi tawhin, Premier League season hnuhnung parukah vawi nga an champion a, tun season ṭan nan UEFA Super Cup nomawi an chawi leh tawh bawk.

Tun season-ah pawh City hi inelna an telnaah chuan champion tura rinkai an ni vek a, Premier League match thum an khelh tawhah la chak vekin, English top flight league khelh meka la chak vek awmchhun an ni - zanin dar 7:30 hian Fulham an mikhual zui ang.

Hetihrual hian Pep hi tun hnaiah a hnungzang na chu zai a ni a, kum 52 mi coach hi Barcelona khawpuia Hospital Quiron-ah inenkawlin a chawl rih - zaninah pawh City a ho thei dawn lo a, a assistant Juanma Lillo chuan a hmun ruak hi a luah rih dawn.

City tana lawmna thlen turin international break hman zui a ni dawn a, Pep hian September 16-a West Ham an lenchilh hunah chuan Premier League champion hi a ho theih tawh a beiseiawm.