United hmaah Bayern; Magpies hmabak a harsa

European football-a club inelna sang ber Champions League group stage draw chu Ningani zan khan neih a ni a, Manchester United chu group khatah Bayern Munich nen an awm ho dawn.

United hi group A-ah awmin, Harry Kane khelhna Bayern nena awmdun hi thil khirh tak niin lang mah se, group A-a awm ve dang hi FC Copenhagen leh Galatasaray an nih avangin tlem chuan an ngaih a ṭha deuh ang.

Galatasaray hian Chelsea forward hlui Hakim Ziyech, United tana lo khel tawh Wilfried Zaha, Arsenal midfielder hlui Lucas Torreira, Napoli legend Dries Mertens leh Inter Milan striker ṭhin Mauro Icardi te ho an nei tih hriat erawh a ṭha.

Arsenal-in PSV Eindhoven, RC Lens leh Sevilla te group B-ah an awmpui avangin last 16 an mitthla nghal ruihin a rinawm a, champion lai Manchester City tan pawh RB Leipzig, Red Star Belgrade leh Young Boys paltlang chu harsa lo tura ngaih a ni.

Hetihlai hian 2002-03 hnua a vawi khat nana Champions League group stage-a inlan tur Newcastle United tan last 16 luh a harsa dawn. Eddie Howe-a naute hian Paris St-Germain, Borussia Dortmund leh AC Milan an awmpui dawn a, group stage an paltlang a nih chuan fak an hlawh khawp ang.

Champion ngun ber Real Madrid-in group C-ah Napoli, Real Madrid, Braga leh Union Berlin an awmpui dawn a, Spanish champion Barcelona pawhin Porto, Shakhtar Donetsk leh Royal Antwerp an awmpui dawn avangin hna harsa a awm lo tura ngaih a ni.