India vs Pakistan: A hun a thleng ta

Asia Cup-ah vawiin tlai dar 3:00 hian Pallekele International Cricket Stadium, Sri Lanka-ah India leh Pakistan an inkhel dawn. Inkhel en châkawm bik a ni a, chutihrualin a chak lo zawk pawhin Super 4 an luh a rinawm avangin a hlut tur angin a hlu tawk lo.

Asia Cup kalphung

Asia khawmualpui tana cricket inelna sang Asia Cup hi ODI format hmanga khelh a ni a, Pakistan leh Sri Lanka ten an thleng.

Group A-ah Pakistan, India leh Nepal an awm a, group B-ah Sri Lanka, Bangladesh leh Afghanistan te an awm thung. Group khat aṭangin a sang pahnih hi Super 4 khel turin an tling ang.

Pakistan-in Nepal hi an sawp tawh. India hian Pakistan an hneh lo a nih pawhin Nepal an hneh ngei a rinawm avangin Super 4 thlen hi chiangsaa ngaih a ni.

Super 4-ah hian vawi khat ṭheuh an inkhel chhuak leh dawn a, India leh Pakistan hi an inkhel nawn a nih chuan tun aiin boruak a sang tawh ang. Chutihrualin ram pahnih hi an inhal avangin chak loh a thiang lo a, inkhel boruak aṭang dawn.

A hmuhnawm dawn

Pakistan-in Nepal an hmachhawn hman avangin an inringtawk khawp ang. Shaheens captain Babar Azam-a'n 151 runs a siam a, India lakah pawh batter talent nei ṭha bik hi mipui mit fukna tur a ni.

Bowling lamah vice captain Shadab Khan-a'n wicket li a la a, India batter-ten hmachhawn an harsat ṭhin erawh Shaheen Afridi a ni a, ani hi bowling lama en hlawh tur a ni thung.

India hi Pakistan aiin an buk a rit zawk. Batter pathum captain Rohit Sharma (110 SR, 46 Avg.), Shubman Gill (106 SR, 69 Avg.) leh Virat Kohli (99 SR, 38 Avg.) te hi kum 2022 aṭanga an khelh dan enin an record a chhe hran lo a, Pakistan lakah chuan record nei ṭha rih lo ber Kohli hi a rinawm ber lawi si.

Cricket ngainatute tana thil thleng pawi thei erawh inkhelhna hmunah hian ruah a sur a hlauhawm. Ruah a sur lo a nih erawh chuan inkhel boruak a sang dawn tih a chiang hle a ni.