Caballero-a'n contract pawtsei

Chelsea goalkeeper Willy Caballero chuan kum khat dang atan contract a pawt sei a, club nen an inrem dan chuan Premier League club tan hian season thar lo awm tur tawp thleng a khel chhunzawm ang.

Kum 38 mi Caballero-a contract neih lai chu kumin June thla tawp ruala tawp ve mai tawh tur hi a ni. Stamford Bridge a chhuahsan ngei dawnin lang hman mah se tunah chuan season khat dang a cham chhunzawm leh dawn ta zawk.

Argentine player hi Blues tan rinrawl a ni ngai lo a, bench luahlumtu a ni ṭhin. Mahse, manager Frank Lampard-a'n Kepa Arrizabalaga chungah rinna pumhlum a nghat lo a, coronavirus len nasat hma February thla bikah chauh pawh Caballero hi match pangaah a chhawr.

Chelsea tan hian tun season tawp ruala contract tawp tur striker Olivier Giroud pawhin kum khat dang atan contract a ziak dawn. Giroud ang bawka June thla tawpa ruala contract zo ve tur Willian leh Perdo te erawh an hma hun a la chiang rih lo thung.