Liverpool midfielder thar Gravenberch

Champions League khel dawn lo mah se Liverpool-in season zawna European club inelna sang khelh loh an duh lo a, squad thuam chak hna an thawk zel - Bayern Munich midfielder Ryan Gravenberch an la lut dawn a, he thuziak i chhiar meuh chuan an in la fel tawh hial ang.

Liverpool leh German champion hian pound maktaduai 34.4-in inremna an nei a, Netherlands international hian Anfield-ah kum nga chhung cham turin contract a ziak dawn a ni.

Kum 21 mi midfielder hian season hmasa khan Ajax aṭangin Bayern hi a zawm ve chauh a, mahse, euro maktaduai 18-a German club zawmtu hian a beisei angin hmun a chang phak lo.

Season hman zawh takah khan inelna hrang hrangah match 33 chiah khel phakin, goal khat a khung a, tun season-ah league match khat khel tawhin, he inkhelah pawh hian bench aṭanga luhtir a ni.

Kum 2021-a Eredivisie Talent of the Year-a thlan midfielder hi Ajax academy aṭanga inzir chhuak niin, September 2018 khan PSV Eindhoven lakah Ajax tana a match hmasa ber a khel - Dutch club tan match 103 khelin goal 12 a khung hman.

Netherlands tan vawi 11 ngawt a inlan tawh avangin a chhe lo ang tih a chiang a, Bundesliga ang thoin beisei a phak lo ang em, tih erawh hunin a la hril ang.

Tarlan tawh ṭhin angin Liverpool hian James Milner, Naby Keita leh Alex Oxlade-Chamberlain te chu nipui transfer-ah an chhuah zalen a, rin loh taka Jordan Henderson leh Fabinho te Saudi Pro League laka an chân zui avangin midfield thuam chak a ngai lehzual.

Reds hian Alexis Mac Allister, Dominik Szoboszlai leh Wataru Endo te chu nipuia player an lei tawh an ni a, tun season league match thum khelh tawhah an la tlawm lo - match hmasa berah Chelsea (1-1) inhnehtawkpuiin, Bournemouth (3-1) leh Newcastle United (2-1) an hneh thung.

Liverpool hi Pathianni zan dar 6:30-ah an inlan dawn a, Unai Emery hnuaia intuaithar mek Aston Villa an mikhual dawn a ni.