Police an chak nuam sa

Zote Toyota MPL10-ah Mizoram Police an inlan ta a, harsatna nei loin Electric Veng FC chu 3-1 in an hneh. Lalbiaksanga Colney hoten match hnih aṭangin point ruk an hlawh chhuak.

Nimin RG Stadium inkhelah hian Police tan F. Lalnuntluanga, Malsawmfela leh Lalfakzuala ten goal khat ṭheuh an khung. Second half-ah Electric Vengin C. Lalhriatpuia hmangin siphurh sut ṭhen mah se goal dang hmuh tur a awm tawh lo.

Mizoram Police hi an vannei a, match hmasa berah Chhinga Veng registration fel loh vangin 3-0 in an chak. Tun ṭumah erawh an thawhrah an seng a, an phu ang ngeiin point thum an hlawh chhuak.

Minute 17-naah Tluangtea leh Sawmfela ten wall pass hmangin Electric Veng tlarhnung an ṭhiat a, Tluangtea'n goal-ah a chantir. Police-in inkhel an thunun a, minute 38-naah Electric Veng defender ball clear ṭha tawk lo chu Sawmfela'n box-ah changin kawh zetin a pet goal.

Police an phur zel. Minute hnih hnu lekah Lalbiakhlua (Biaktea) goal ban a per a, hemi per hi Fakzuala'n a pet goal. Police tlarhma goal bawh a na a, 3-0 in hma an hruai.

Second half-ah erawh Electric Veng an insiamrem a, minute 58-naah ding lam aṭanga Thangroṭhuama cross chu Hriata'n a pet goal. EFC hian chance ṭha dang an nei a, Joseph Lalsanglura'n a tauh lut lo.

Police an insiamrem a, Electric Vengin chance hlauhawm an nei zui tawh lo. Bsa Colney hote pawhin chance chu nei bawk mah se goal khung ngeina tur erawh a awm bik lo.

September 5, Thawhlehni hian Police-in Project Veng FC an hmachhawn dawn. Inkhelhna hmuh tur hi 1st Bn MAP Ground, Armed Vengah khelh a nih dawn avangin Police hi an tawh a khirh khawp ang.