Dan theih loh Carlos Alcaraz

Carlos Alcaraz tan hna harsa a la awm rih lo, nimin zing second round inkhelah world number 1 hian a khingpui Lloyd Harris chu 6-3, 6-1, 7-6(4) a hnehin third round a inhlangkai.

Spanish tlangval hian US Open a khelh tawh zawng zawngah, match 13 chak tling tawhin ṭum khat chauh chak loh a la nei. Third round-ah chuan Dan Evans nen an inkhel ang, inkhel dangah Evans hian Botic van de Zandschulp chu 1-6 6-1 6-3 6-3 in a hneh.

US Open-ah hian mipa leh hmeichhe zingah a zawna champion thei an tam lo a, an awm lohna pawh a rei leh ta. Kum 2008 khan Roger Federer-a'n a title a humhim, a hnu lamah midang ti thei an la awm leh lo - Alcaraz hian a beisei ve leh mek.

Kum 20 mi Alcaraz chuan, "Grand Slam a nih chuan miten inkhel hmuhnawm en an beisei ṭhin, chutiang match chu kan chhawp chhuah theih avangin ka lawm," a ti a, seeded 26-na Evans nen an inkhel tur pawh a hautak dawn tih a sawi bawk a ni.

Inkhel dangah Daniil Medvedev pawhin hnehna a chang. Russian tlangval hian a khingpui Chris O'Connell chu 6-2, 6-2, 6-7 (6-8), 6-2 in a hneh a, major title a neih chhun a lakna hmunah kawng dik a la zawh zel.

Player langsar zinga mi Andy Murray erawh a chak lo. Grand Slam vawi thum champion tawh Murray hian seeded 19-na Grigor Dimitrov chu 6-3, 6-4, 6-1 a ngam loin second round-ah a zinkawng a tawp.

Kum 36 mi Murray chuan, "A thiam rual zinga tel ve phak tura beih chu a hautak ta hle, hetiang taka khelh chhuah ṭhat loh chu a hrehawm pawh ka ti," a ti a, inelna lian hmachhawn turin tunah chuan a ṭha tawk lo tih a inpawm.

Inkhel dangah Jannik Sinner leh Alexander Zverev te an chak laiin, hming langsar zinga mi Matteo Berrettini erawh Arthur Rinderknech lakah a chak lo, set hnih an khelh zawh hmain hliam vangin a inhnukdawk, an khelh tawh chinah pawh 6-4, 5-3 in a hniam zawk a ni.