Chanmari thar = Goal chhuah lo
Chanmari FC-in tlarhnung thuam ṭhain Zothanmawia (T. Mawia) an lalut a, rah ṭha a awm - Project Veng FC lakah goal chhuah loin 1-0 in an chak.
Nimin tlai RS Stadium-a inkhelah hian Chanmari FC tan Vincent Lalduhawma'n minute 30-naah goal awmchhun a tauh lut a, K. Malsawmkima hoten an phu angin point thum an hlawh chhuak.
Zote Toyota MPL10-ah Chanmari FC, Chawnpui FC leh Mizoram Police FC ten point ruk vek an hmu a, round hnihna lekah team lian leh te a hriat ṭan.
Hei le, T. Mawia
Chanmari FC board-in an tlarhnung pawp zia an hria a, a thuam chak turin I League club Gokulam Kerala-a khel lai T. Mawia an lalut. College Veng keeper hi MPL a khelh hnuhnun berah best goalkeeper a ni a, Durrand Cup khel zo hlim a nih avangin a inringtawk hle.
Coach Mala hoten MPL kai thar Project Veng an hmachhawn avangin T. Mawia'n dan tur a meuh lo a, mahse ball sem lamah a ṭangkai thung.
T. Mawia chuan, "Chanmariin min khelhtir dan kha Gokulam-a kan coach te duh dan tho a ni a, tlarhnung aṭanga ball sem turin min duh. Keimah pawhin nuam ka ti hle," tiin Vanglaini a hrilh.
Chanmariin match hmasa berah goal thum an chhuah a, T. Mawia awm hnuah an chhuah lo. Fiahna hautak zawk erawh September 4, Thawhṭanniah a thleng dawn. 1st Bn MAP Ground-ah I Day Football semifinal-a an hneh loh Chhinga Veng an hmachhawn ang.
Goal khung thei Vincent
Chanmariin inkhel an thunun a, goal khung an harsat thung. Lalkhawpuimawia'n ball ṭha a hmu thei lo a, Project Vengin defensive game an khelh bawk avangin talbuai thei an ni.
Minute 30-naah CYMA Football-a Tlangnuam tana goal khung thei zet Vincent kha a rawn in lar a, corner kick aṭanga ball kal chu sang taka zuangin a tauh lut. Vincent hi a vanneih ṭum ni se goal hnih khung thei a ni a, referee-in foul a ham avangin goal hnihna pawmsak a ni lo.
Chanmari tlarhmaa Laltlanzova a hmuhnawm a, Zozoa hian a chance ṭha insiam chu goal ban pet per nan a hmang. Box pawn aṭanga kawh zeta a pet pawh goal pawnah chiah a kal bawk.
Game Plan nei Project
Project Vengin point hlawhchhuah tumin defensive game an khel a, tlarhnungah player pali awm rengin counter attack hmanga goal khung an tum.
Kolasib club hian tum fel tak nei mah se an tum ram erawh an thleng ta lo. Second half-ah MS Dawngzuala vawrhluh chu winger Lalfamkima'n pet fuh tawk lo mah se keeper T. Mawia a pel a, goalline a thlen hmain an clear hman.
Project Veng an insiamṭha hret a, amaherawhchu FC Venghnuai leh Electric Veng FC te nen point an la hlawh chhuak lo.
Nimin Inkhel Result
Chanmar FC 1 - 0 Project Veng FC
CFC: Vincent Lalduhawma 30'
MoM: Ramngaihsanga, CFC