Lewandowski leh Xavi inkar boruak a khi?

Beisei anga season bul ṭan ṭha lo Robert Lewandowski chuan tun hnaiah an khelh dan a duh khawp loh thu a sawi chhuak a, Barcelona coach Xavi tan a striker chhuanvawr thusawi hi ngaihthlak a nuam lo ang.

Barcelona hian an league match hmasa pathum aṭangin point sarih an hmu a, goal ruk khungin, an lamah goal thum a lut - an goal khung zinga goal khat chiah hi Lewy khung a ni a, Polish striker nen a inhmeh lo.

Mahse, Lewandowski chuan, "Barcelona kan ni miau a, hnehna chang tur ringawta beisei kan ni lo. Attacking football hmuhnawm tak pho chhuak tel tura beisei ṭhin kan ni. Mahse, tun hnaiah chutiang chuan kan khel lo a, chance insiam pawh kan harsat phah.

"Ferran Torres emaw Ansu Fati emaw an rawn luh hi chuan tlarhma lama nawr ṭhin an nih avangin, chance pawh kan nei ngah sawt zel. A chang chuan attacking player kan khelh tamtir tawk lo a, min thlawptu ka neih ṭhat tawk ṭhin loh avangin team tana ṭha ber tur ka ngaihtuah ṭhin," a ti!

Poland international chuan season dang anga goal a la khung tam tawk loh chhan chu goal khung ringawt a ngaihtuah tawh loh vang nia a hriat thu a sawi bawk.

Lewy chuan, "Tawnhriat kan ngah zel a, tunah chuan keima tan chauh ni lo, team pumpui tan ngaihtuahna ka seng nasa lehzual tawh," a ti a, an khelh dan avanga chance insiam chawp a ngaih chang a awm thu a sawi zui bawk.

Kum 35 mi striker chuan, "Centre back pahnihin min kar cheh tawh chuan an tan a awlsam ṭhin. Chance ka nei tam lo a, kan match hnuhnung pahnihte kha en ula, hun ṭha ka ngah tawk lo a ni. Ka duh angin ball ka hmu tam tawk lo a, a chang chuan keimaha chance ka insiam mai a ngaih chang a awm," a ti.

Lewy chuan a form theih nana mawhphurtu ber erawh amah a nih thu sawi zuiin, "Ka theihna sang bera ka khelh zel a ṭul a, game kan khel tam ang a, ka ṭha chho zel ang. Game khelh tur tam tak a la awm a, kan bul ṭan dan aiin a tawp kan khar dan a pawimawh zawk," a ti a, a la inringtawk hle.

La Liga champion lai Barcelona hi Pathianni zan dar 12:30-ah league match khel turin an inlan dawn a, Osasuna an lenchilh ang. Match thum khelh tawha la chak vek Real Madrid chuan zanin dar 7:45-ah Getafe an mikhual ang a, Atletico Madrid chuan Pathianni zan dar 10:00-ah Sevilla an mikhual dawn thung a ni.