Mourinho bula khel tur Lukaku

Romelu Lukaku chuan Chelsea aṭangin AS Roma chu loan hmangin a zawm fel a, manager tawnhriat nei ṭha tak Jose Mourinho kaihhruaina hnuaiah Belgian striker hian a theihna tak pho chhuah a tum ang.

Lukaku hian theihna sang tak a nei, mahse a khelh fuh leh fuh loh kar a hla ṭhin hle. Blues lamin chhuahtirna an zawng a, season hmasa lama loan hmanga hawh tawhtu Inter Milan nen indawr mah se a hlawhtling lo.

Serie A club tho Roma an rawn lang a, an inrem thei ta a ni. Lukaku hian Saudi Pro League aṭang pawhin sawmna duhawm tak dawng mah se European football khelh chhunzawm a la thlang zawk.

Kum 30 mi Lukaku chuan, "Roma neitute tan kan inbia a, an thil tum leh hmathlir min hrilh hnuah ka tan thutlukna siam a harsa lo hle. Fans nei ṭha tak an ni a, anni ho nena thawhho hlan ka nghakhlel tawh hle a ni," tiin a sawi.

AS Roma hian nizan zanlai khan AC Milan an mikhual a, result kan hre hman lo. International break a awm zui dawn - September 17, Pathianni zanlaia Empoli an mikhual hunah chuan Lukaku hi a inlan theih tawh a rinawm.