Chelsea-in City aṭangin Palmer an la lut

Bazar nuam ti Chelsea an bazar leh ta a, Manchester City aṭangin forward Cole Palmer chu pound maktaduai 40-in an la lut - a man hi a khelh ṭhat dan a zira £2.5mtd pek belh tura tih a ni a, kum sarih chhung atan contract ziakin, kum khat dang pawhsei theih a ni bawk.

City academy aṭanga inzir chhuak Palmer chuan, "Bul ṭan ka châk tawh takzet a, he club ka zawm thei hi ka lawm hle. Chelsea hmachhawpte hian min tihphur êm avangin he club hi ka zawm a, ka theihnate pholanna hun remchang min siamsak dawn vang a ni tel bawk.

"He squad-a player-te hi kum naupang tak tak, hlawhtlin châka tuihalte an ni a, result lawmawm tak kan thawhchhuah ho theih ka beisei," a ti a, Palmer hian City-in UEFA Super Cup nomawi an chawina leh Community Shield-a Arsenal an hneh lohna inkhelah goal a khung ve ve.

Chelsea co-sporting director Laurence Stewart leh Paul Winstanley te chuan, "Cole hian Premier League leh Champions League nomawi chawi tawh ni chungin he club hi a rawn zawm a, kan tlarhma min tichak sawt dawn a ni.

"A thiamna leh theihna te hmun harsaah lo pholang fo tawhin, England tan European Under-21 Championship-ah khan a theihna a lo pholang tawh bawk. A hringnun bung thar keu turin a inpeih a, chu bung thar chu Chelsea-a a ziak tur hi kan lawm a ni," an ti.

Kum 21 mi Palmer hian season hman zawh takah khan City tan inelna hrang hrangah match 25 khelin goal khat a khung a, assist vawi khat a nei. City tan hian match 41 khel hmanin goal ruk a khung a, assist vawi hnih a nei.

Euro Under-21 2023-a champion England team-ah khan Palmer hi a tel bawk. Chelsea hma hian West Ham chuan lakluh tumin dawr mah se, City boss Pep Guardiola chuan an player chu a chhuak dawn a nih chuan loan-a chhuak lo a, hralh an duh zawk thu a sawi a ni.

Chelsea hian tun nipuiah pound maktaduai 300 chuang player lei nan an seng tawh a, beisei ang result erawh an la nei bik lo. League-a an match hmasa berah Liverpool (1-1) chu mahni mualah in-draw puiin, West Ham (3-1) lakah an tlawm a, Luton Town (3-0) an hneh thung.

League Cup lamah pawh AFC Wimbledon chu 2-1 in an hneh a, League Two club an nih avangin inchhuan viau erawh a harsa - zanin dar 7:30-ah Nottingham Forest an mikhual dawn a, Mauricio Pochettino enkawl team tan chak ngei a ṭul.