Hamilton leh Russell tan contract thar

Lewis Hamilton leh George Russell te chuan a rei lo berah pawh kum hnih chhung chu Mercedes car an khalh chhunzawm dawn. Mercedes driver pahnih hian contract thar an ziak ve ve a ni.

Kum 38 mi Hamilton-a'n a contarct thar hi a hmang zo a nih chuan kum 40 mi a ni tawh dawn a, a team hman thiam tan hian season 13 a hmang dawn tihna a ni a, champion hnem ber record siam theih ngei a la inbeisei tihna a ni thei bawk ang.

Britain tlangval Hamilton hian Formula 1 title pasarih a la tawh, champion hnem lamah Michael Schumacher nen an intluk mek, record siam chho thei mai tura a lan laiin Max Verstappen a rawn lang a, thil a harsat phah ta a ni.

Tun hnai season hnih chhung hi Red Bull driver Verstappen a chak fal a, kuminah pawh a champion ngei a rinawm. Hamilton tan record siam tur chuan Red Bull leh Max-a tlan pelh theih ngei a ngai dawn.

Hamilton chuan, "Engtik lai pawhin hlawhtlinna chan châkin kan la tuihal reng, tun hma lama kan hlawhtlin tawhna aṭang pawhin thil tam tak kan la chhawm zel thei bawk a, midang aia ṭha zawk kan nih leh theih ngei ka beisei," a ti.

September 3, Pathianni zan dar 6:30 hian Autodromo Nazionale Monza tlankawngah Italian Grand Prix an tlan dawn a, kumina a vawi khat nan Mercedes driver pahnih hian hnehna chan an tum ang.