Isner tan match hnuhnung ber

US Open khelh ṭan hmain John Isner chuan a tana tournament hnuhnung ber a nih tur thu a sawi lawk. Ningani zan khan Isner hian second round-ah Michael Mmoh chu 3-6, 4-6, 7-6 (7/3), 6-4, 7-6 (10/7) in a ngam lo, a zinkawng a tawp.

American player Isner hi kum 38 mi a ni tawh a, a vanglai pelin a hun ṭha a liam tawh. Tennis a khelh hun chhung hian match 489-ah hnehna chang tlingin, singles nomawi 16 a la tling hial a ni.

A service ṭha tak hi a hmingthan chhan pakhat a ni. BBC tarlan dan chuan ṭum 14,470 teh meuh aces a siam a, record nei ṭha ber a ni - amah hnaih bertu aiin vawi 700 chuangin a siam hnem zawk.

6ft 10in a sang Isner chuan, "Kan ramah ngei mai ka hun hnuhnung ka hmang thei a, duhsak taka min ṭantute au thawm kha ka tan chuan hriat a nuam takzet, an duh ang ka tipuitling zo ta lo erawh pawi ka ti hle," tiin a sawi.