United defender thar Sergio Reguilon

Luke Shaw leh Tyrell Malacia inhliam avanga left back lama talbuai tak Manchester United chuan an mamawh chhanna an hmu ta a, Tottenham fullback Sergio Reguilon chu season khat chhung loan-a khel turin an la lut dawn - medical a paltlang vek tawh a, he thuziak i chhiar meuh chuan an in la lut fel tawh ang.

Erik ten Hag-a enkawl United hian Chelsea-a hmun chang lo Marc Cucurella pawh lakluh tumin an dawr a, mahse, an beisei anga indawrna a kaltluan loh avangin Reguilon lam an hawi a, an tifuh ta. Reguilon hian September 2020 khan Real Madrid aṭangin Tottenham Hotspur a zawm a, mahse, season hmasa pawh kha Atletico Madrid-ah loan-in a khel.

Red Devils hian Sofyan Amrabat chu Fiorentina aṭanga lakluh an tum bawk a, mahse, loan hmanga lakluh an tumna chu hnarsak an nih avangin sum sen a ṭul dawn niin a lang.