NECS Cup khelh zawh an tum

21st May, 2020

Aizawl District Football Association hnuaia inelna lian ber NECS Cup 2020 chu hripui Covid-19 vangin chawl lailawk mah se khelh zawh ngei an tum, tun season chhunga tih tur ruahman sa ṭhenkhat erawh ṭhulh a ni thung.

ADFA chuan Phullen Zone-in a thlen tur ADFA Cup 2020, II leh III Division Season Ending Tournament leh General Body Meeting an neih tur erawh an ṭhulh fel tawh a, club tlahniam leh kaisang pawh a siamrem ta zawk a ni.

Aizawl DFA secretary Lalbiakhlua chuan, "Hri a leng a, harsatna thleng thei leh thleng mek pawh a tam. Heng karah hian tournament neih laklawh lai NECS Cup 2020 erawh khelh zawh ngei kan tum a, khelh chhunzawm hun tur erawh a la hriat theih rih loh," tiin Vanglaini a hrilh.

Khua/veng inelna lian hi March 16 thleng khan Ramhlun Sports Complex-ah khelh a ni a, sorkar thuneitu lamin an ngen angin March 17 aṭangin an chawl lailawk.