An intawng dawn ta: Chanmari FC vs Chhinga Veng FC

Zote Toyota MPL10-a inkhel en châkawm fe fe a ṭhahnem a, round 3 bika en châkawm ber chu vawiin chhun dar 12:00 hian Chanmari FC leh Chhinga Veng FC ten an khel dawn.

1st Bn MAP Ground, Armed Venga MPL match hmasa ber tur a ni a, team lian pahnih inkhel tur an nih bawk avangin chhun pachang pawh ni se entu an ṭhahnem tura ngaih a ni.

T. Mawia vs Lawma

Chanmari FC-in Zothanmawia (T. Mawia) an la kir a, Project Veng FC lakah goal chhuah loin bul a ṭan. T. Mawia hi a ball sem a ṭha a, veng/khua inelnaah chuan College Veng tan centre back-a khel thei ngat a nih avangin keeper-sweeper tia chhal theih a ni hi a mak lo.

Chhinga Veng attacking a ṭhat avangin T. Mawia hian ball a pet thiamzia chauh ni loin a hna tur dik tak ball dan a thiamzia a lantir a ṭul dawn. Chhingcows lamah goalkeeper chhuak thar ṭha bera chhal theih RS Lallawmzuala a awm thung dawn.

T. Mawia hian Lawma hi vawi tam thurawn a pek ve tawh a ni a, Republic Veng tlangval Lawma hi MPL9-ah best goalkeeper ni pha lo mah se dawn phu titu an ṭhahnem. Tun season-ah pawh Lawma hian bul a ṭan ṭha, season chawlh lai a hman ṭhat avangin season liam ta aiin a ball pet a ṭha tawh zawk.

Dawngtea vs Rinchhana

MPL ṭantirh lama Chanmari kal vung chhoh laia an innghahna chu tlarhmaah MS Dawngliana (Dawngtea) a ni a, tlarhnungah Lalrinchhana Tochhawng te an ni.

MPL-a Chhingcows champion ṭuma player pawimawh chu Rinchhana leh Dawngtea te tho an ni. Chanmari hian Coach Sanga hnuaia Chhingcows tana MPL nomawi chawitu Rinchhana leh T. Mawia bakah K. Lalthlahlova, Hmingthanmawia, Lalkhawpuimawia, Lalrammuanpuia leh Laldampuia Tochhawng (asst coach) te an kawl bawk.

Dawngtea hi coach Sanga hnuaiah khel leh a, Rinchhana leh a ṭhian dangte nen an inhmachhawn dawn. Mizoram tana vawi duai lo feh chhuak tawh Rinchhana hian season liam ta khan Chawnpui FC champion puiin MPL best player ni lai a ni a, Chanmari-ah MPL nomawi hawn kir a tum.

CYMA Football-ah khan Chanmari coach K. Malsawmkima hian Bawngkawn enkawlin Dawngtea hian Republic Veng lakah goal ṭha bik vawi hnih a khungsak a, an inkhelhna hmun tur hi vawiina inkhelhna tur 1st Bn MAP Ground a ni. Mala'n Dawngtea theihna a hria a, Rinchhana tawnhriat hmangin dan a tum dawn a ni.

Rawlthar ṭha rual

MPL tawnhriat nei ṭha an ṭhahnem a, player chhuak thar an la tam zawk. Vincent Lalduhawma'n Project Veng laka goal pawimawh khung tura sang taka a zuang thei kha hmuhnawm a tling. Champhai Kanan (Inter Village Football) leh Chawnpui FC (MPL9) champion puitu Laltlanzova che vel a hmuhnawm em em bawk.

Chhinga Veng forward Suanngaih-muana'n (Amuana) I League club Aizawl FC hmaah a theihna a lantir a, I Day Football final leh MPL10-a an inkhelh ṭum thlirte chuan an hrechiang lehzual ang.

Chanmari lamah Lalthangliana (AB-a), Thanglanven Gangte leh Crespo Lalhriatpuia te ho an awm. Chhinga Veng lamah Lalnunzira, Isac Zomuanpuia, Isaak Malsawmkima, FC Lalhmunmawia leh C. Lalhunruata te an hriam chho ṭan.

Player ṭha rual hi coach ṭha Mala (Chanmari) leh Sanga (Chhinga Veng) ten an enkawl dawn a, a hmuhnawm loh ring suh. Chanmari an phur thar a, Chhinga Veng lam tan inkhel enna a hnai dawn thung.

Electric Veng hmaah Chawnpui fiahna

Zote Toyota MPL10-ah champion lai Chawnpui FC chu a chung berah an awm mek a, vawiin tlaia Electric Veng FC an hneh theih chuan a chung berah an awm chhunzawm thei ang.

Lalrindika Hmar kaihhruai Chawnpui hi Electric Veng lakah rinkai zawk an ni a, chutihrualin inkhelhna hmun tur 1st Bn MAP Ground, Armed Veng a nih avangin point thum hmuh a awlsma dawn lo.

Electric Veng hi Aizawl South FA nena inthlunzawm an ni a, naupang che rang rual an nih bakah inkhelhna tur 1st Bn MAP Ground hi a te bawk avangin goal venhim a awlsam hret a rinawm. EFC hian tlarhmaah C. Lalhriatpuia an kawl bawk a, Chawnpui lakah point hlawhchhuah ngei an tum dawn a ni.