Medvedev leh Zverev chak

US Open khelh laiah Novak Djokovic leh Carlos Alcaraz te hming a langsar a, player ṭha bik pahnih baka champion beisei ngamtu Daniil Medvedev leh Alexander Zverev te pawhin hmalam an pan zel - last 16 an inhlangkai tawh a ni.

Inrinni zanlai, keini tana Pathianni zing ni tawhah seeded pathumna Medvedev chuan Sebastian Baez chu 6-2, 6-2, 7-6 (8-6) in a hneh. New York khawpuiah pawh zanlai dar 1:30 thleng an inkhel hial.

Russian tlangval Medvedev chuan, "Zing dar 4:00-a kan zo lo kha a lawmawm lai chu a ni, zan dar 11 vela inkhelh ṭan chu a boruak a rit duh khawp mai," a ti a, taksa mai bakah rilru a hah tel tih a sawi.

Inkhel dangah Alexander Zverev pawhin Grigor Dimitrov lakah 6-7 (2-7), 7-6 (8-6), 6-1, 6-1 in hnehna a chang a, a match lehpekah chuan Stan Wawrinka hnehtu Jannik Sinner nen an intum leh ang.