Durand Cup champion Mohun Bagan

India rama football inelna ngaihhlut hlawh Durand Cup final chu nimin khan khelh a ni a, Kolkata derby-ah Mohun Bagan chuan 1-0 in Lalchungnunga khelhna East Bengal an hneh a, an champion.

Salt Lake Stadium-ah inkhel boruak a sang a, hetihrual hian chance hlauhawm tia sawi hluai tur team pahnihin an nei har hle - first half hun pek belhah Dimitri Petratos chuan goal khungna remchang a nei a, mahse, a chhawr lo.

Team pahnihin chance pangngai tak siam an harsat a, inkhel boruak erawh a 'hot' loh phah chuang lo - minute 56-naah East Bengal boss Carles Cuadrat chu referee thutluknaah a lungawi lohna a tilang nasa hret a, yellow card pek a ni.

Minute 60-na a ni a, Bagan bawkin chance an nei - mahse, Hugo Boumous chuan an chance neih duhawm a chhawr thei lo a, 0-0 a la ni reng. Minute hnih a liam a, Bagan an chesual zui.

Bagan midfielder Anirudh Thapa-a'n a ke a khai sang hret a, East Bengal forward Javier Siverio chu a luah a kein a pet fuh - referee-in a ngaihtuahna sen nawn ṭul a ti lo a, red card phawrhin Thapa a chhuahtir.

East Bengal-in Cleiton Silva hmangin chance an nei zui a, Bagan keeper Vishal Kaith chuan a dang ṭha takzet - Mohun Bagan vanneih a kaltluang laklawh. Counter-attack hmangin an nawr let thut a, Australian striker Petratos chuan a rintlak reng tih pholangin minute 71-naah goal a khung.

Saudi Pro League lama Al Wehda tan pawha lo khel tawh Petratos ball lakluh a ṭha a, a hmawr bawkna a finishing a tawih lehzual.

East Bengal-in duhthlan tur dang an nei lo tih hriain, theihtawp chhuahin an nawr zui a, mahse, Bagan tlarhnung an ṭhiat hleithei lo - hun pek belh minute thumnaah Red & Gold-in an beisei loh zawk an hmu a, assistant coach Dimas Delgado chu Bagan boss Juan Ferrando nen an inhnial avangin hnawhchhuah a ni.

Hun tawp thlengin East Bengal an tho tawh lo a, group stage-a an hneh hnu Mohun Bagan an ngam loh avangin Bagan zawkin Durand Cup an chawi a, Kolkata derby-ah hnehna hla an sa.