Award lawm nan Haaland-a hattrick

Erling Haaland chuan PFA Player of the Year leh UEFA Men's Player of the Year lawmman a dawn hnua a match hmasa berah goal thum a khung a, a team Manchester City chu Fulham lakah 5-1 in hnehna a chanpui.

Haaland hian hattrick a siam bakah Julian Alvarez tan a siamsak a, defender Nathan Ake chuan goal khat a tauhlut ve bawk. An goal hnihna Ake-a'n a khung danah erawh offside niin a lang - Fulham lamin pawm thiam harsa an ti viau. Haaland pawhin Ake goal khung hi offside-ah a ngai!

Pep Guardiola-a'n match hnih chhung Manchester City a enkawl thei lo a, a awm loh karah assistant manager Juanma Lillo chuan a hna tlin takin a lo thawk. Fulham hma hian Sheffield United an lo hneh tawh bawk a ni.

International break a awm zui dawn a, an lo kir leh hunah chuan Citizens hian London Derby khel turin West Ham an lenchilh ang.