Sum ngah ngah an hmelṭha chuang lo
Nipui transfer-ah pound maktaduai 380 chuang seng mah se Chelsea-in an beisei ang result an hmu thei chuang lo a, an mikhual Nottingham Forest lakah 1-0 in an tlawm - Blues ṭantuten coach Mauricio Pochettino an 'star' lo ṭan der tawh!
Forest tan nipui transfer-a an lakluh Anthony Elanga chuan a club thar tana a goal hmasa ber a khung a, Chelsea-in a chhanletna tur an neih loh avangin mikhual team an chak.
Chelsea hian Premier League match li an khelh aṭangin point li chiah an la hmu a, an elpui Manchester City-ten point 12 lai an lo neih tawh bawk si avangin Blues tan chuan season ṭantirah champion sawi ngam a harsa nghal!
A har a ni
Todd Boehly leh a thawhpuiten Chelsea an lei hnuah transfer bazar vawi thum an hmachhawn tawh a, player lei nan pound tluklehdingawn khat chuang an seng tawh - a tawi zawnga sawi chuan heti zat sum hi chuan Nottingham Forest ang chu a club pumpuiin an lei thei!
Mahse, sum sen hnem ringawt hi chakna a ni lo - Stamford Bridge-ah Chelsea-in 76% zet ball changin vawi 21 shot nei mah se goal hmaah an vannei tawk lo a, hmawr bawktu ṭha tawk an awm lo tiin a sawi theih bawk. Chumi hrilhfiahtu chu target-a vawi hnih chiah shot an neih kha a ni.
Blues tan Nicolas Jackson chuan si phurh sutna remchang tak nei mah se, Raheem Sterling-a chance siamsak duhthusam chu goal-ah a chantir thei lo - Romelu Lukaku thar em ni, tih palh mai awl tak a ni rih!
Bazar fuh zawk
Chelsea-in coach thar Poch an lakluh bakah, player 10 ngawt tun nipuiah an la lut a, an player langsar tak tak ni ṭhin engemaw zat an chhuahtir bawk - an chet dan en chuan London club hian indinthar an tum niin a lang a, khelmualah erawh indinthar tum an nihna hmuh turin a awm rih lo.
Forest pawh hian Chelsea ang thoin tun nipuiah player 10 ngawt an la lut a, Blues ang emin sum sen tur an ngah tawk ve lo tih chauh a ni. Mahse, tun dinhmuna a lan dan chuan Forest hi an bazar fuh zawk niin a lang a, goal khungtu pawh nipuia Manhcester United aṭanga lakluh Elanga a ni.
Pound maktaduai 100 chuang man Moises Caicedo-a'n ball a hloh hnuah Elanga hian chak taka tlan luhpuiin, Forest tan inkhela goal awmchhun a khung a, an chakpui zui - Premier League-a away match an khelh hnuhnung 21-ah an vawi hnih chakna chauh a ni.
Beisei bo?
Poch-a'n result a danglam theih beiseiin City aṭanga £40mtd-a an lakluh Cole Palmer chu bench aṭangin an luhtir a, mahse, English forward ṭhangduang hian a team tan danglamna a thlen thei bik lo a, an tlawm.
Blues boss Poch chuan, "Result ṭha zawk neih tumin kan theihna zawng zawng kan hlan a, kan duh kan hlawhchhuah loh avangin kan hnual hle a ni. Mahse, football-ah chuan tihsual kan neih chuan hrem kan ni nghal zel si a ni," a ti a, chhuanlam a zawng lo.
International break hman zui a nih dawn avangin Blues tan thawkna hun a awm dawn a, Poch-a'n chawlh lailawkah siamrem an ngaihna lai a ngaihtuah chhuah a ṭul ang.