Premier League club-ten sum an hmang hnem leh ta!

European football-a league ngaihven hlawh ber Premier League chuan September 2, zing lam dar 3:30 vel khan nipui transfer an khar ta a, tun nipui transfer-a Premier League club-te sum sen zat chu pound tluklehdingawn 2.36 a tling tawh.

English top flight league-a club 20-te hian season hmasa nipui lai khan player lei nan £1.92tld an seng a, season hmasaa an sum sen zat an khumna ringawt pawh hi £400mtd a tling.

Transfer tawp niah Premier League club-te hian £255mtd ngawt an seng tling a, season hmasa nipui transfer tawp nia sum sen £120mtd nen a intam hleih hle - January transfer an la bak a, season khata transfer sum hman nen £2.73tld chu an tluk ngei a rinawm.

European football-a top five league an tih, Premier League, La Liga, Serie A, Bundesliga leh Ligue 1-a transfer zawng zawng zinga 48% chu Premier League-a thleng a ni a, PL hian tun nipuiah player hralhna aṭangin £550mtd ngawt an la lut bawk.

Tawpna ni chu

Premier League transfer tawp niah player transfer tia han sawi vul chuk tur a awm hran lo. Manchester City-in Wolves aṭanga £55mtd-a Matheus Nunes an lak chu transfer tawp nia player man to ber a ni a, City hian Chelsea hneah Cole Palmer chu £40mtd-in an hralh bawk.

United-in Fiorentina aṭangin Sofyan Amrabat chu £8.6mtd sengin loan-in an la a, an duh chuan a nghetin £17.1mtd-in an lei zui thei ang a, a khelh ṭhat dan a zirin £4.2mtd pek belh leh tur a ni ang. Red Devils hian Tottenham Hotspur full back Sergio Reguilon chu loan thoin an la.

Nottingham Forest chu transfer tawp nia buai ber an ni a, player pasarih ngawt an la. PSV Eindhoven midfielder Ibrahim Sangare chu £30mtd-a lain, Chelsea winger Callum Hudson-Odoi leh Bologna midfielder Nicolas Dominguez te an la lut bawk.

Liverpool striker hlui Divock Origi chu AC Milan aṭangin loan-in an la a, Liverpol chuan Bayern Munich aṭangin Ryan Gravenberch chu £34mtd-in an la lut bawk - kum 21 mi Netherlands international hi Reds hian Bayern a zawm hma aṭang khan an lo enthla tawh a, kum nga chhung atan contract a ziak.

Hmun dangah chuan

Spain lamah chuan Barcelona-in loan-in player langsar pahnih an la lut a, City defender Joao Cancelo leh Atletico Madrid forward Joao Felix te chu an lakluh an ni. Hetihlai hian Lionel Messi thlak tur ang hiala sawi Ansu Fati chuan Tottenham Hotspur sawmna hnarin Brighton & Hove Albion chu loan-in a zawm bawk.

Paris St-Germain chuan France striker Randal Kolo Muani chu transfer tawp hmain an la lut hman hram bawk a, Eintracht Frankfurt player manah hian £64.2mtd pein, a khelh ṭhat dan a zirin £12.8mtd an pek belh ang - kum nga atan contract a ziak.

Fulham midfielder Joao Palhinha chuan Bayern Munich zawm turin Germany-ah medical nei vek tawh mah se, Fulham hian amah thlakna tur an lakluh hman loh avangin German champion a zawm thei ta lo a, Al Ittihad-in £150mtd-a Mohamed Salah lei an dilna chu Liverpool chuan an hnar bawk.

Hetihrual hian Saudi Pro League transfer hi September 7-ah a tawp dawn chauh a, Saudi club hian £200mtd-in Reds hi an dawr nawn dawn niin an sawi - Liverpool tan ṭan reng a har mai thei!