Reliance leh MFA buatsaih Naupang League Season 2 an ṭan leh ta

Reliance Foundation Young Champs leh Mizoram Football Association buatsaih ‘RFYC Naupang League 2023-24 Season' chu September 2, Inrinni khan Aizawl District leh Champhai District-ah te khelh ṭan a ni a, tunkar chho hian Lunglei District leh Kolasib District lamah pawh ṭan a ni ang.

Naupang League hi thla riat chhung awh tur a ni a, Aizawl bik hi RG Stadium-ah khelh tur a ni. Inelna ṭan ni hian I League club Aizawl FC player-te chuan naupang inkhel turte hi 'guard of honour' an lo pe a, naupang kal khawmte an phur phah hle.

Aizawlah hian team 14 an awm a, team tin hian category panga - Under 6, Under 8, Under 10, Under 12 leh Under 14 an nei vek. Inelna hi league hmanga khelh tur a ni a, school chawlh huna neih ṭhin tur a ni. Reliance hian a thlawn vekin team telte hi jersey, mawza, tui bottle leh bag an pe a, inelna ṭha tak an buatsaihsak a; football hmasawnna piah lamah naupang hriselna atan a ṭha hle.

Season liam ta Naupang League kha ṭha taka buatsaih a ni a, kumin hian hmasawn ngei tumin technical lam pawh an bei nasa hle.