Greenwood-a'n Getafe a pan

Manchester United forward Mason Greenwood chuan tun season chhung loan hmanga khel turin Getafe a pan. Club pahnih inrem dan chuan, loan hun a zawh hunah Spanish club hian a ngheta an lei theihna tur dan a tel lo a ni.

Kum 21 mi Greenwood hian khelmual pawn lamah buaina a nei a, he buaina hi thla ruk chhung an chhui hnuin thla hmasa mai khan Man United chuan thuchhuah an siam a, inremsiam tawna chhuak thei a nih thu an sawi.

Getafe tana khel mah se Manchester United chuan an player hlawh 50% chuang an la tumsak dawn a, khawthlang chanchinbu miten an tarlan dan chuan Getafe lamin an tum ve tur hi a tlem zawk niin an sawi hial.

Getafe manager Jose Bordalas chuan, "Khelmual leh football pawn lam boruak chu ka sawi thei lo a, thil a nih tur leh a thlen tur ang a thleng zo tawh. Ka hriat chin chu Greenwood hian theihna sang tak a nei.

"Beiseina sang tak nen Getafe a rawn pan a ni a, a theihna ang taka a khelh chhuan theih nan kan pui ang," a ti. Man United academy aṭanga inzir chhuak hi chhawr ngei a tum a, a lakah beiseina pawh a nei sang.