James-a'n basketball khelh a châk tawh

Los Angeles Lakers superstar LeBron James chuan Covid-19 vangin khawvel buai mek mah se basketball khelh a chak tawh thu a sawi a, inkhel tur erawh chuan sorkar leh NBA thuneitu lamin phalna an pek phawt a ngai.

March 11 khan Utah Jazz center Rudy Gobert chu coronavirus a kai tih hriatchhuah a ni a, hemi ni aṭang hian basketball inelna sang ber chi chawlh lailawk nghal a ni, regular season pawh an zawh hman loh avangin inelna an nei chhunzawm thei dawn em tih a chiang lo.

Lakers thiampuipa James chuan, "Season kan hman chhunzawm leh ngei ang tiin beiseina ka la nei reng. Keimah chauh ni loin, ka thiante, kan team pumpui hian inkhelh kan chak tawh takzet.

"Team dang pawhin inkhelh an châk tawh tih ka hria. Amaherawhchu thutlukna siam theitu kan ni lo a, infiammi kan nih avangin damdawi leh ei leh bar chungchangah hri leng hian eng nge a nghawng theih tih kan hrechiang ve lo, thurawn kan lak thiam a ngai," a ti.

Season an chawlh lailawk hma khan Lakers hi Western Conference hmahruaitu an ni a, a thiam pariat inelna playoff khel turin an tling tawh. Hri leng vang hian All Star Game erawh tun season atan chuan a awm dawn lo tih a chiang tawh.

North America-ah hian Pathianni aṭang khan NASCAR stock car series chu a hmuna entu awm loin tlan ṭan a ni leh tawh. Tunah hian NBA bakah inelna lian dang Major League Baseball, National Hockey League leh Major League Soccer te chuan season la hmang chhunzawm leh rih lo mah se beiseina an la nei vek.