TT training of trainers an zo fel

Table Tennis Fede-ration of India (TTFI) kaihhruaina hnuaia neih, Mizoram State Sports Council (MSSC) leh Mizoram Table Tennis Association (MTTA) ten an buatsaih coaches development programme (Training of Trainers) chu tluang taka zawh fel a ni.

Training hi August 29 aṭanga September 2 chhung khan Mizoram Table Tennis Hall, Mission Vengah neih a ni. Inrinnia kharna hun hi TTFI Secretary General Kamlesh Mehta chuan video conferencing a hmanpui a, Mizoram thil tih chu state dang tan pawha entawn tlak a nih thu leh, rah duhawm tak a chhuah ngei a beisei thu a sawi bawk.

International Table Tennis Federation (ITTF) Level 3 coach Ashwin Kumar Pudakone kaihhruaiah training hi neih a ni a, Mizoram district hrang hrang pakua aṭangin mi 22-in training an nei a, mi paliin A+ grade hmuin training an zo a, mi 14-in A grade hmu-in midang pali chuan B grade an hmu ve thung. Training chhung hian trainer hi coach Lalhunhlua'n a pui ṭhin.

MSSC leh MTTA buatsaih tho in, TTFI kaihhruaina hnuaiah August ni 29 -31 chhung khan Synod Conference Centre leh Mission Vengthlang YMA Inpui-ah Umpire Training Programme chu hlawhtling taka buatsaih a lo ni tawh bawk. Training programme atan hian TTFI chuan trainer tur a rawn tir a ni.