Ruahsurin India a chhan

Asia Cup-ah India leh Pakistan inkhel chu ruahsur vangin khelh zawh theih a ni lo a, point khat ve ve an insem. Pakistan-in Super 4 an lut a, India erawhin first round patlang turin Nepal an hneh a la ngai.

Pallekele International Cricket Stadium, Kandy-a inkhelin ngaihven a hlawh. Ṭhumvawra chak India-in bat hmasak an thlang a, top order Rohit Sharma (11), Shubman Gill (10) leh Virat Kohli (4) te run siam belhkhawm chu 25 runs chauh a ni. Ishan Kishan (82) leh Hardik Pandya (87) te chet ṭhat zarah India-in 266 runs an siam a, ṭum dang ang thoin tailender-te batting-ah an thawh hlawk lo.

Rohit Sharma hote tan 266 runs hi chakpui theih a nih rualin Pakistan dinhmun a ṭha hret a, amaherawhchu cricket ngainatute hlauhthawn lawk ang ngeiin ruahsur vangin Pakistan an bat hman lo.

Vawiin tlai dar 3:00 hian India-in Nepal an hmachhawn dawn a, hneh harsa tur niin a lang lo. Group A aṭangin India leh Pakistan te hi chu tling chiang tur anga ngaih an ni sa. Group B-ah Sri Lanka, Bangladesh leh Afghanistan te an awm a, nimin tlai khan Afghanistan hian Bangladesh an hneh a nih chuan inelna thlengtu Sri Lanka leh Afghanistan ten Super Four an lut ve bawk ang.