Real chhanchhuaktu maw? A ngai bawk a ni e!

Jude Bellingham-a'n Spain nuam a ti laklawh a, goal khung a bansan thei lo - Inrinni zan khan hun pek belhah Real Madrid tan chakna goal a khung a, a team hi Getafe lakah 2-1 in hnehna a chanpui.

Santiago Bernabeu-a inkhelah rin loh takin Getafe tan Borja Mayoral chuan minute 11-naah goal hmahruai a khung a, second half ṭantirah Joselu chuan a sut - Real hian harsatna êm êm tawng loin hnehna an chan zui mai a rinawm.

Mahse, beisei angin thil a thleng lo. Real-in goal dang an khung lawk thei lo a, hun pek belh minute sarihnaah Bellingham hian chakna goal a rawn khung - league match li a khelha goal nga a khungna chiah a ni.

Getafe beiseina

Real khelmualah Getafe tan chak ai chuan, point khat hawn beisei chu thil finthlak a ni. He team hian loan-a Manchester United striker Mason Greenwood an lakluh avangin ngaihven an hlawh thar bawk a, mahse, Greenwood hi Getafe lakah erawh squad-ah a la awm lo thung.

Minute 11-na a ni a, Santiago Bernabeu a reh duk - a chhan maw? Real striker hlui Borja Mayoral chuan a club hlui lakah goal hmahruai a khung a, keeper Kepa Arrizabalaga leh defender Antonio Rudiger ten theihtawp chhuah mah se an team an chhanhim thei lo.

Borussia Dortmund aṭanga lakluh Bellingham-a'n penalty a hlawh chhuakah inngai mah se, video assistant referee rawn a nih hnuah thutlukna hi sut a ni a, Luka Modric-a ball tauh ṭha zet pawh bar chung lamah David Soria chuan a nam liam.

Mamawh chhanna

"A huntêa rah ṭhin," tih ang mai a ni a, Real player leh fan te hlauthawng taka an awm hnuah Bellingham a inlar - hun pek belh minute sarihnaah Modric-a ball cross aṭanga kal chu chakna goal ni turin a khung a, Bernabeu thawm chu ring tak a ni.

Bellingham hian Bernabeu-a a match hmasa ber niin, goal a khung nghal a, league match li a khelh tawhah match tinah goal a khung vek - Zinedine Zidane jersey number rochuntu hian French midfielder hnug zui zo turin kawng dik a zawh zel.

Real hian an stadium chung chu a khuhna hawn theihin an siam a, hei vang hian an league match hmasa pathum chu khualmualah an khel - a chung an siam zo a, stadium chei thara an match hmasa berah an chak nghal.