Milan chak laiin Napoli chak lo

Serie A champion lai Napoli chu tun season chhunga a vawi khat nan an chak lo. Inrinni zan inkhelah Naples club hian an mikhual Lazio chu 2-1 in an ngam lo a, an match hmasa pahnihah chak mah se chak vek record an nei chhunzawm thei ta lo.

AC Milan chuan Zirtawp zan khan AS Roma 2-1 in an luhchhuah tawh thung - Milan hian tun season league match pathum an khelh tawhah hnehna an la chang fai vek a, table hmahruaitu an ni.

Mikhual Lazio lamin Luis Alberto hmanga an hmahruaina chu Piotr Zielinksi-a'n sut mah se, second half-ah Daichi Kamada chuan Serie A goal hmasa ber khungin a team a chakpui daih.

Napoli hian season hmasa khan kum 33 hnu a vawi khat nan Serie A nomawi an chawi a, mahse an champion hnu lawkah coach Luciano Spalletti chu a bang a, a aiawhtu Rudi Garcia kaihhruaina hnuaiah an indin thar leh mek a ni.

Stefano Pioli enkawl AC Milan chuan champion an tum ngam tih an lantir. Milan hian Olivier Giroud-a penalty leh Rafael Leao te hmangin goal an khung a, minute 61-naah Fikayo Ramori hnawhchhuah a ni.

Player tlem zawk an nih hnuah pawh Milan an inveng thei viau. Jose Mourinho enkawl Roma lamin hun tawp hma chiahin Leonardo Spinazzola-a penalty hmangin goal khat an sut hram.