Harsa takin Jabeur a tlang

Ons Jabeur chuan US Open last 16 lut turin fiahna hautak a paltlang, seeded pangana hian nimin zing khan Marie Bouzkova nen darkar thum deuhthaw an inkhelh hnuin 5-7, 7-6 (7-5), 6-3 in hnehna a chang.

Arthur Ashe Stadium-a inkhelah Jabeur a khel ṭha viau a, chutihrualin seeded 31-na Bouzkova chu malpui hliam vanga enkawl a ngai hial - Tunisian star Jabeur pawh New York a thlen hnua damlo a nih avangin player pahnih an chau hle.

Kum 29 mi Jabeur chuan, "Inelna hautak hmachhawn hi nuam ka tih zawng tak a ni, chutiang tur chuan ka taksa pawh hi a chhel tawk a ni. Set thum khel turin ka inpeih a, harsatna ka nei lo," tiin a sawi.

Inkhel dangah seeded pahnihna Aryna Sabalenka chuan Clara Burel chu 6-1, 6-1 in a hneh. Belarus nula hian set hnih chhungin game hnih chiah a hloh tihna a ni a, inkhel a thunun hneh hle.

US Open khelh laiah Sabalenka hian set a la hloh miah lo, a match lehpekah chuan Daria Kasatkina nen an intum ang. Seeded 13-na Kasatkina hian Greet Minnen 6-3, 6-4 in a hneh ve thung a ni.