Bayern-in Gladbach an hneh ve ta

Bayern Munich-in Bundesliga an thunun a, Borussia Monchengladbach lakah pawh chak mai tura ngaih an ni. Amaherawhchu August 2, Inrinni zana an inhmachhawn hma hian match nga chhung chu Bavarians hian Gladbach chu an hneh tawh lo.

Borussia-Park-a inkhelah Gladbach-in bul an ṭan ṭha a, ṭum khat aia tam Bayern tlarhnung an rum ṭhaih hnuah Kou Itakura-a'n minute 30-naah a khung. Itakura tauh hma hian Maximilian Wober-a'n pial avangin Bayern tlarhnung tan tih theih tak pawh a awm lo a, a tauh ṭhat em avangin Sven Ulreich tan pawh dah theih a ni lo.

Gladbach-in tlarhnung an hnawhphui ṭha a, Harry Kane pawhin chance a insiam thei lo. Bayern tan Leroy Sane chu player hlauhawm ber a ni a, Man City forward hlui hian first half-ah crossbar a pet per. Second half-ah Sane dan reng theih a ni lo a, minute 58-naah Joshua Kimmich ball vawrh luh chu Sane hian a awm hmanga la thlain a khung.

Bayern-in an nawr chhunzawm a, a tawpah an goal bawh nat rah an seng. Minute 87-naah catpain Kimmich-a corner pet chu Mathys Tel-a'n a tauh goal. Bavarians hi 2-1 in an chak a, Bundesliga match thum khelhah vawi thum an chak.

League hmahruaitu erawh Xabi Alonso enkawl Bayer Leverkusen an ni a, Darmstadt 5-1 zeta an hneh avangin Bayern aiin an goal difference a ṭha zawk. Bavarians elpui ber tura ngaih Borussia Dortmund pawh a chesual a, an mualah Heidenheim nen 2-2 in an inhnehtawk a, match thum aṭangin point nga an hlawk chhuak thung.