Goal 850 khungtu Ronaldo

Saudi Pro League-ah Al-Nassr chuan 5-1 in Al-Hazm an sawp a, Cristiano Ronaldo leh Sadio Mane te chu goal khungtu zingah an tel - Ronaldo hian Al Nassr a pan hnuah match 30 aṭangin goal 26 a khung tling ta chiah a, chawlh zai a rel thei lo.

Ronaldo chuan, "Team hnathawh ropui tak kan hmu leh ta a, hma kan sawn zel ang. Ka career-ah goal 850 zet ka khung ta a, a tawpna tur a ni lo e," a ti a, footballer zinga goal 850 khung thei hmasa ber a ni.

Al Nassr hi table-ah parukna an ni mek a, hmahruaitu Al Hilal chu match nga khelh tawhah point liin an phak lo mek. Al Hilal hian Zirtawpni khan Al Ittihad chu 4-3 in an hneh - Al Hilal tan hian Aleksander Mitrovic chuan hattrick a siam a, a tlawm zawk Ittihad tan Karim Benzema chuan goal khat a khung ve bawk.

Hetihlai hian Steven Gerrard enkawl Al Ettifaq chuan 3-1 in Damac an hneh a, Moussa Dembele chuan Ettifaq tan hian goal hnih a khung - Jordan Henderson pawh Ettifaq tan hian a inlan a, Al Nassr chung chiahah awmin pangana an ni mek.

Roberto Firmino, Gabri Veiga, Riyad Mahrez leh Allan Saint-Maximin te khelhna Al Ahli erawh an mualpho a, anmahni anga star langsar pawh sawi tur nei ve lo Al Fateh chuan 5-1 ngawtin an sawp.