Magpies sawp thei Brighton

Premier League club lian te an lian fal ṭhin a, mahse season hmasa khan Newcastle United chu a sang pali zingah an tel phak - Magpies ang bawka team hmuhnawm chu Brighton & Hove Albion an ni.

Inrinni zan khan team pahnih hi an intawng a, mualneltu Brighton lamin rawlthar Evan Ferguson-a hattrick hmangin an mikhual Newcastle chu 3-1 in an hneh a, hun tawp dawna Callum Wilson goal khungin awmzia a nei phak lo.

Coach Graham Potter a chhuak a, a hmun ruakah Roberto de Zerbi awmin ṭha takin hna a thawk. Chelsea pansantu Marc Cucurella aiin Pervis Estupinan chu a ṭha zawk emaw tih mai tur a ni a, an coach leh player hlui an ngai lo ang.

Midfielder ṭha Moises Caicedo leh Alexis Mac Allister te an chhuak ve leh a, mahse player naupang leh khel khat zawkte tan hun an siamrem thei mai zel a, khelh dan phung nghet an neih avangin an buai rih lo, tun season league match li an khelh tawhah vawi thum an chak.