Spurs-in Son Heung-min an nei!

Tottenham Hotspur-in Harry Kane chân mah se Son Heung-min an nei a, South Korean striker hian Inrinni zan khan hattrick a siam - Spurs hian khualmualah Burnley chu 5-2 in an sawp a, league match li an khelh tawhah tlawm an la nei lo.

Burnley hian minute lina lekah Lyle Foster hmangin goal hmahruai an khung a, Premier League kai thar an phur hman hle. Mahse, coach thar Ange Postecoglou hnuaia indinthar mek Spurs-in an hlauthawng lo a, minute 16-naah Son Heung-min hmangin an chhanglet nghal.

London club hian inkhel thunun zuiin, Cristian Romero chuan first half hun pek belh minute hnihnaah a khung belh a, 2-1 in chawlhlawk hman a ni. Second half-ah pawh Spurs lam hian inkhel an thunun zui.

Minute 54-naah James Maddison chuan a club thar chu nuam a ti, tih pholangin an goal thumna a khung a, Turf Moor-ah Burnley an tho dawn lo tih a chiang tawh - captain Son chuan goal hnih dang khung zui ve lehin, 5-1 a ni.

Burnley mualpho lutuk tur thup nan Josh Brownhill chuan hun pek belhah goal khat a khung ve leh a, 5-2 in Spurs an chak - Tottenham hian match li aṭangin point 10 an nei ta a, Burnley erawh match thumah chak la nei loin table mawngphah an luah mek.

Kum 31 mi Son tan nikum September-a 6-2 a Leicester City an hneh ṭuma goal thum a khung hnua hattrick a siam leh hmasak ber a ni a, Premier League bikah hattrick a siam vawi lina a ni bawk.

Spurs boss Ange chuan, "Sonny khan a khel ṭha takzet. Ni tin hmasawn tuma training-naa a chet dan chu fak tlak a ni a, hruaitu nih a tlin takzet. Vawiinah pawh kan goal nawrna kawngah hmahruaitu a ni a, a chance neih chhawr turin a thiam bawk si a ni. Ka lawmpui takzet e," tiin a captain a fak.

Tottenham tan Harry Redknapp, Tim Sherwood leh Antonio Conte te khan an match hmasa paliah point 10 an hlawh chhuak a, Postecoglou-a'n a rawn ti ve leh ta - coach pathum tih theih loh nomawi chawipui a tum ang.