Real, Bayern leh Inter inkhel dawn

Real Madrid, Bayern Munich leh Inter Milan te chuan nakkumah European Solidarity Cup khelh an tum a, club lian pathumin an inkhelhna aṭanga an sum hmuhte chu Italy leh Spain rama coronavirus vanga harsatna tawkte ṭanpui nan an hmang ang.

European ram zingah chuan Spain leh Italy ten Covid-19 an tuar nasa, ram pahnihah hian nimin tlai thleng khan mi 27,709  leh mi 32,007 an thi tling tawh. Kai thar leh thihpui an awm belh zel a, hri hi an la buaipui rei viau dawn niin a ngaih theih.

Club lian pathum hi an mahni khelmualah ṭheuh an inkhel kual dawn, inṭhianṭhat nana tih chu ni bawk mah se ṭanpui ngai puihna tura sum tuakna tur a ni.

Thla hnih vel an chawlh hnuah German champion Bayern hian Bundesliga season an hmang chhunzawm leh thei tawh a, hetihlai hian Real Madrid leh Inter te hian engtikah nge La Liga leh Serie A an khelh chhunzawm theih dawn tih erawh an la hrechiang thei rih lo.