Arsenal hmaah Man United Tlusawp!

Thu ziak thiamin thawnthu a ziak a, amah duhthusam ang ngeia a hmawr a bawk ang mai hi a ni. Arsenal chuan an mikhual Manchester United lakah ṭhat an chhuah hmasa zet nain, a tawpah erawh an duh loh thlengin goal an barh lui - a dawngtu tan lem a harsa ang.

Pathianni zan Premier League inkhel hmuhnawmah Gunners chuan Man United 3-1 in an hneh, point insem tur anga an lan hnuin pound maktaduai 105 man Declan Rice leh Gabriel Jesus ten an khung belh.

Man United tan Marcus Rashford-a'n goal mawi a khung a, mahse Arsenal captain Martin Odegaard chuan a sut rang hle, a tawpah a huaisen leh chak tuma goal nawr ngam zawk North London club an chungnung.

Player thlan dan

Mikel Arteta-a'n season hmasa EPL match zawng zawnga a chhawr vel Gabriel chu tun season an match hmasa pathumah bul a ṭantir lo, inkhel pawimawhah erawh Barzilian defender a lo kir, inverted full back-a khel thei Oleksandr Zinchenko lo kir vang pawh a ni ngei ang.

Zinchenko leh Jurrien Timber an hliam lai kha chuan Thoams Partey-a pawh let a ngai a, hei vang hian tlarhnung siksawi a ngai - Gabriel an dah chhuah phah, tunah erawh Zichenko nen an ṭhat dan takin an ding dun leh thei tawh.

Erik ten Hag-a'n Raphael Varane leh Luke Shaw te a chhawr thei lo a, captain hlui Harry Maguire ai chuan Victor Lindelof a ring zawk a, tlarhnung laiah Lisandro Martinez nen a dah kawp, hnung lam pui turin Casemiro a awm bawk.

Striker man tam Rasmus Hojlund chu dam tawh mah se Anthony Martial chu a hma laiah bul ṭantir a ni zawk. Borussia Dortmund aṭanga beiseina sang taka nena an lakluh Jadon Sancho chu bench lamah pawh a hmel hmuh tur a awm lo.

A tir boruak

Emirates Stadium boruak a nung a, forward Kai Havertz a langsar hmasa. Germany international hian hnai zetah a pet ṭhelh, pet fuh zauh ni se la chuan a goal ngei a rinawm, a hnua a ball pek sual chu Man United lamin goal khung nan an hmang.

Ten Hag-a'n goal venhim a ngaipawimawh a, chumi karah chuan tlan chak Rashford hmanga counter attack an tum - English forward hian Christian Eriksen hnen aṭanga a ball hmuh chu Ben White leh William Saliba te hmaa ding chungin a khung pawp.

Man United lawm chhung erawh a rei lo, minute khat hnu lekah Arsenal lamin an chhang let nghal. Mual sira hlauhawm tak Gabriel Martinelli-a ball pek chu laklawh nei miah loin Odegaard chuan a hlap lut - keeper Andre Onana tan tih theih a awm lo.

Havertz hming bawk lamrik a ngai - box chhungah a tlu a, referee Anthony Taylor chuan penalty a ham. Mahse, VAR hman niin Taylor hian ngun taka a en hnuah ama thutlukna a sut a, penalty hnuhkir a ni.

A tawp boruak

Inhnehtawk thei dinhmunah an ding a, team pahnih erawhin chak dan an ngaihtuah. Jesus, Takehiro Tomiyasu leh Fabio Vieira te dah luh an nih hnuah Arsenal boruak a kang hret, a tawp boruak sangah Reiss Nelson a rawn tlan lut bawk.

Ten Hag pawhin striker tharum ngah Hojlund leh rawlthar huaisen Alejandro Garnacho te a duh lut. Argentina international Garnacho hian hun tawp dawnah tawih zetin goal a khung, chakpui turin inngai hman mah se VAR hman a nih hnuah offside vangin an hnawl.

Arsenal lamin na takin an nawr zui a, corner aṭanga ball kal chu Rice-a'n laklawh zetin a dang, goal lama petna turin hmun awm lo angin lang mah se na zetin a pet lui a, keeper Onana chuan lo khawih hman mah se a dang zo lo - stadium chhung boruak chu pui tak a ni.

Man United lamin nawr let mah se ball an hloh a, substitute Vieira chuan Jesus tana lak nuam tawk chuahin ball a pe. Brazilian striker hian amah vengtu defender a bum tluk hnuah chak nemnghehna goal a khung.

Chak duha tuihal

Manchester United an hneh hnuah Arsenal manager Mikel Arteta chu an khelh danah a lungawi hle a, player mai bakah Emirates Stadium chhung leh pawn lama team thlawptu fans chungah lawmthu a sawi.

Arteta chuan, "Kan team rilru put hmang hian min tilawm, hnehna chan châka kan tuihal dan leh theihtawp kan chhuah dan te kha a hmuhnawm êm êm a, beidawng miah loa min thlawptu khelmual sira awm fan-te khan an tiropui zual.

"Match li an khelh tawh chinah hnehna chan phu vekin kan khel a, kan chak kim ṭhap lo erawh a uiawm. International break neih hma chiaha hetiang result duhawm kan nei thei hi a hlimawm takzet," a ti.

Spanish manager hian a squad a thuam chhah tawh viau, defender thar Jurrien Timber hliam mah se midang khel tur a nei a, goal an mamawh leh venhim an ngaih changin bench aṭanga lut tur a nei ṭha ta bawk - season hmasa aiin beisei an nei sang zual dawn.

Kai Havertz-a'n beisei a la phak chiah lo, coach Arteta chuan German forward hi hmangaihna nen dawhthei taka nghah a ngaih thu a sawi a, a theihna ang taka khelh chhuahtir theih a inring, hun erawh a mamawh hret dawn a ni.

Declan Rice erawh a man a tam ang ngeiin a theihna a sang a, a bik takin inkhel boruak sangah a ṭangkai zual dawn niin a lang. Arteta chuan, "Midfield lai thunun thei tur kan mamawh a, chutiang chu Rice hi a ni, goal nawr kawngah a ṭangkai bawk.

"Inkhel khaikhawmtu pawimawh a ni a," a ti. Rice an lei tirh khan Arsenal ṭantute zingah ngei pawh a man a tam mah mah ti tawk an awm, a mak hran lo. Mahse, tunah zet chuan club player man tam ber nih a phu tih a takin a lantir der tawh a ni.

United leh buaina

Defender pawimawh inhliam vangin khelmual chhungah Manchester United an buai a, hun tawp dawna Harry Maguire leh Jonny Evans an inkawp a ngaih tawh chinah phei chuan Arsenal goal nawr an dawl zo lo.

Arsenal an hneh loh boruak hrehawm lai takin Jadon Sancho a rawn ṭawng chhuak zui, hliamah chi a phul. England international forward hian an manager Erik ten Hag chu a hming langin sawi chiah lo mah se, dawt sawi hmangah a puh hmiah!

Inkhelh hmain Ten Hag chuan inkhel tura Sancho an thlan loh chhan chu training-na lama a tihṭhat tawk loh vang niin a sawi. Manchester United tana khel tlak leh khel phak tura beih a ngaih thu a sawi bawk.

Mahse, Sancho erawhin, "Thil hmuh leh chhiar te hi a dik vek emaw tih nghal ngawt loh a ngai. Theihtawpin kar tluanin training ka nei ṭha, ka khelh loh chhan chu thil dang vang a ni a, hun rei tawh tak aṭang khan kei chu a tuartu mai ka ni zel hi a dik bik lo.

"Ka duh ber chu hlim leh nuam ti taka inkhelh a ni, coaching staff lamin thutlukna an siam hi chu ka zah hle. Player ṭha leh ropui tak tak nen kan awmkhawm a, eng boruak pawh awm se inkhel phak turin ka bei zel ang," a ti.

Old Trafford a pan hnuah Sancho hi hliam vangin a buai a, a hliam dam hnuah pawh beisei angin a khel ṭha tawk lo - rinrawl leh danglamna thlen theitu ni tura an ngaih kha ni mah se, tunah chuan team ti kimtu zinga pakhat mai a ni rih.

Dutch manager Ten Hag-a'n chinfel ngai a nei nual dawn tihna a ni. International break a awm zui dawn, player ṭha chin chu mahni ram tan an feh chhuak ang. Premier League khel tura an lo kir leh hmain a chinfel dan tur a ngaihtuah chhuah hman a ngai ang.