Project Veng hi an chhe lo - Police coach

Zote Toyota MPL10-ah vawiin chawhnu dar 2:00 hian Mizoram Police FC leh Project Veng FC te an inkhel dawn. Lalbiaksanga Colney kaihhruai Police hi vawi hnihah vawi hnih an chak a, Kolasib club erawh match hnihah an la chak lo ve ve.

Police coach BS-a Colney chuan, "Project Veng hi team pangngai tak an ni a, an chhe lo. Kan inkhelhna tur hi a zim bawk avangin khelh a har dawn. Fimkhur a ngai dawn a, goal khung hma a pawimawh ang," tiin Vanglaini an hrilh.

Kolasib club hian I Day Football match thumah point an hmu lo a, MPL-ah pawh a danglam lo. Chutihrualin an inkhelh tawhna aṭangin an inzir ṭha a, Chanmari FC an hmachhawn ṭumah chuan defensive game khelin K. Malsawmkima hote tan harsatna an thlen.

Police lakah pawh Project Veng hian goal venhim hna an thawh nawn a rinawm a, chutihrualin counter attack theihna a awm a nih chuan hman ṭangkai ngei an tum dawn. Inkhel nung ṭha a beisei thei ang.