Liverpool-ah Salah a hlim; goal khungtu Szoboszlai

Saudi Pro League club Al Ittihad-in pound maktaduai 150-a lei an tum Mohamed Salah chuan Liverpool-ah a hlim tih thiltih hmangin a lantir a, Pathianni zan khan Liverpool tan goal a khung leh ta.

Liverpool hian Premier League-ah an mikhual Aston Villa chu 3-0 in an sawp a, nipui transfer-a lakluh Dominik Szoboszlai chuan Reds tana a goal hmasa ber a khung bawk - Villa defender Matty Cash chuan an lamah a tilut thung.

Jurgen Klopp-a Liverpool-in an league match hmasa berah Chelsea an inhnehtawkpui a, hemi hnuah erawh an hawikir leh tawh lo. Reds hian Bournemouth (3-1), Newcastle United (2-1) leh Villa (2-0) a zawnin an hneh ta.

Cherries leh Magpies an hneh ṭum hian Liverpool hian red card an chawi ve ve a, chuti chung chuan an chak tho. Villa lakah tun season-a a vawi khat nan goal an chhuah lo a, point thum piah lamah Klopp-a lawmna belhchhahtu a ni.

Hungary 'magic'

Liverpool-in pound maktaduai 60-a an lakluh Szoboszlai lakah beiseina an nei sang tih a chiang a, chumi tilangtu chu club legend Steven Gerrard-a hak ṭhin number 8 ngat an haktir chu a ni - Szoboszlai hian ball a thiam a, a ball pek a fing a, a che vel a hmuhnawm ṭhin hle.

Heng zawng zawng tifamkim tur hian Villa lakah goal a khung ta a, a ke vei lama a pet chu Emiliano Martínez-a'n a dang thei lo - Villa tlarhnung an inhawng mah mah a, Liverpool-in tlarhma an neih ṭhat bawk si avangin an duhthalin an chen a ni ber!

Minute 22-naah Mohamed Salah-a siamsak chu Darwin Nunez chuan goal-ah petin, post a per a, mahse, a per let lehlam hian Matty Cash perin Villa goal-ah a lut daih. Anfield-a inkhel an nih bawk avangin chak tur a chiang der, tiin a sawi ngam.

Liverpool hian chance dang pawh an nei zui a, mahse, Szoboszlai goal khung tur siamsaktu Trent Alexander-Arnold-a ball thlawh luh ṭha zet chu Joel Matip chuan uiawm takin a tauh goal thei lo.

A hming Salah

Liverpool vanneih zan ni se, goal tam zawk khung thei an ni hial. Matip-a'n a chance neih a chhawr loh hnuah Salah leh Nunez ten uiawm zetin an khung lo a, Nunez-a'n Arnold-a siamsak a khung loh ngat phei chu kar hmasa lawka goal hnih khungtu a ni ta lo em ni chu aw, tihpalh mai awl a ni.

Mahse, goal dang khung loin Liverpool an awm rei lo. Minute 55-na a ni a, Salah a inlar - Nunez-a ball tauh chu Egyptian forward hian hnai tak aṭangin goal-ah a chantir a, 3-0 a ni. Salah hian chance dang pawh a nei zui a, mahse, Cody Gakpo tana siamsak thlang loa a pet kha chu siamsak zawk se aw, ti an tam ang.

Arnold pawhin ṭha taka ball a lakluh hnuah khungna remchang a nei a, mahse, a hun ṭha neih a chhawr thei lo. Villa hian chance nei lo tawp an ni bik lo. John McGinn leh Moussa Diaby ten hun ṭha an nei a, mahse, goal net an zawng hmu zo lo.

Liverpool-in goalkeeper tura Alisson ber kher an lo nei hi chu lawmthu sawi fo tur an ni. Brazilian keeper hian Cash hun ṭha neih chu a dansak a, a tawpah nuamsain Liverpool an chak.

Arnold a dinhmun

Match hmasa pathumah Arnold-a'n khel chhe hran lo mah se beisei a phak lo a, Villa lakah erawh Arnold tak tak kha hmuhtirin kan awm - a che vel a hmuhnawm a, a ball pek a fing a, goal nawr kawngah tlarhma a pui ṭha takzet bawk.

Liverpool defender hi minute 71-naah hliam vangin lakchhuah a ngai a, mahse, Klopp chuan a defender hi ngaihtuahawm a nih loh thu a sawi. German coach chuan, "Eng ang taka na nge a nih ka hre lo a, a malpui na a tih thu min hrilh.

"Mahse, hliam na tak a nih loh thu pawh a sawi a, eng pawh ni se, kan scan phawt ang a, a dinhmun chiang tak chu kan hria ang," tiin a sawi.

Liverpool tan captain Virgil van Dijk chu hrem vangin a inlan thei lo a, Ibrahima Konate a inhliam bawk avangin a laiah Matip leh Joe Gomez an inkawp a, Arnold-a hliam nat loh hram an beisei ang.