Naupang League aṭangin player ṭha thur dawn

Reliance Foundation Young Champs leh Mizoram Football Asso-ciation buatsaih ‘RFYC Naupang League 2023-24 Season' chu khelh ṭan a ni leh ta. Naupang League atan hian Reliance-in sum ṭhahnem tak an seng a, hetia inelna ṭha tak an buatsaih bakah hian ham ṭhatna dang a awm dawn.

Inelna hi district pali Aizawl, Champhai, Lunglei leh Kolasib-a neih a ni a; naupang hi an kum milin category panga - Under 6, Under 8, Under 10, Under 12 leh Under 14-ah ṭhen hran an ni.

League match zawng zawng khelh zawh hnu hian Under 12 leh Under 14 ten Inter District Tournament an khel dawn a, district tina player ṭhaten inelna an hmachhawn dawn.

Player ṭha 40 thlan chhuahte chu Mumbai tour neihpui tur an ni ang. Hei bakah hian Under 12 leh Under 14 aṭangin player ṭha 14 ve ve thlanchhuah an ni dawn a, heng player talent nei ṭhate hian Elite Programme (Emerging Talent) an chhim dawn. Player ṭha thur chhuahte hi Aizawlah Mumbai Academy-a coach-ten training an pe ang.

RFYC Naupang League hi nikum khan hlawhtling takin neih a ni tawh a, tuna RFYC leh MFA hnathawh ṭha tak hi ṭha taka chhunzawm a nih chuan kum 5-10 hnuah chuan Mizoram football-in a rah seng theih tura beisei a ni.