Chanmari FC-in Chhinga Veng an hneh ta

Zote Toyota MPL 10-ah Chanmari FC an hmuhnawm chho zel a, nimin khan an elpui Chhinga Veng FC chu 2-1 in an hneh. Chanmarians an chungnung a, Chhingcows kim loin an khel bawk nen goal hmaah hriam deuh phei se hei aia tam khung thei an ni.

1st Bn MAP Ground, Armed Venga inkhelah Chanmari tan R. Laldanmawia'n goal hnih a khung a, 1-0 a nih laiin Chhingcows captain MS Dawngliana hnawhchhuah a ni. Hun tawp hma hretin Chhinga Vengin Suanngaihmuana hmangin khung bawk mah se chak phu zawk Chanmari an chak.

Kum 7 hnuah

Chanmari hian September 2016 khan Chhinga Veng hi 4-1 in an hneh a, hemi hnu hian an hneh leh tawh lo. Tun season-ah pawh hian Chanmarians hian hlauhthawnna lian tak an nei a, an inkhelhna hmun tur a zim bakah Chhingcows player-te an chet ran avangin an hlauhthawnna hi a awm lo hran lo.

Inkhel an ṭan a, Lalrinchhana Tochhawngin Chanmari captain armband rawn hrengin tlarhnung a phuisui sawt a, inkhelah erawh an inhnehtawk hle.

Minute 36-naah mawi zetin Chanmariin Chhinga Veng tlarhnung an ṭhiat a, R. Laldanmawia'n a hmawr a bawk. Goal hian nghawng lian tak a nei a, minute thum hnuah Chhingcows forward Dawngtea chu insum zo loin Crespo Vanlalhriatpuia a pet lui a, red card pek a ni.

Chanmari hian an tam zawkna an hmang ṭangkai lawk lo a; Danmawia, Lalkhawpuimawia leh Laltlanzova te an inthlawp ṭha tawk lo - goal an khung tlem phah. Sialhawk Express Danmawia'n minute 70-naah goal hnihna a khung leh tho a, 2-0 a ni.

Chhingcows keeper Lawma a che ṭha a, Chanmariin an khung belh lo. Forward chhuak thar ṭha mi Suanngaihmuana erawhin scoresheet-ah a hming a rawn nem kai leh tho a, minute 80-naah siphurh a sut ṭhen. Chhinga Veng an tlem tawh a, Chanmariin harsatna an tawk lo.

Engtin zel?

Chhinga Vengin I Day Football nomawi chawi mah se MPL10-ah chak an la nei lo, match thumah point khat chiah an la hmu. An player pawimawh Dawngtea hrem a ni dawn a, match hnih a khel thei lo.

A êng zawnga thlir erawh chuan Chhingcows point hlohna hi team ṭha Mizoram Police, Aizawl FC leh Chanmari te an ni. Lalsangzuala Hmar hoten team nem zawk an tum ṭan dawn.

Chanmari erawh MPL9 thlir chuan hma an sawn hle. Season liam taa relegation playoff khel khan match thumah point kua an hmu a, semifinal lut tura an point hmuh zat chanve dawn chu an hmu ta.

MPL10-a che ṭha tur hian Chanmariin player langsar Danmawia, Khawpuimawia, T. Mawia leh player ṭha dang an la lut nual. Coaching staff-in fak an phu a, club board hnathawh hi hmuh hmaih a thiang lo bawk.