Electric Veng FC = Chawnpui FC

MPL champion lai Chawnpui FC-in point an hloh a, nimin tlai khan Electric Veng FC nen 1-1 in an inhnehtawk. 1st Bn MAP Ground a tet avangin result danglam deuh a awm chho dawn niin a lang a, goal a luh tam loh pawhin goal chance a tam zel ang.

Chawnpui FC hian match hmasa pahnihah hnehna an chang a, Electric Veng lakah pawh chak tura rinkai an ni. Amaherawhchu, Chawnpui hian an beisei ang ngawtin inkhel an thunun thei lo a, Electric Veng goal bawh a na zawk.

Electric Veng forward C. Lalhriatpuia a nung ṭha a, match of the match-a thlan a ni zui. EFC hian bul ṭan ṭha mah se Chawnpui zawkin goal an khung hmasa zawk. Minute 22-naah Chawnpui hian corner kick hmang ṭangkaiin Lalramnunmawia'n ṭha zetin a tauh goal.

Electric Veng khel a nung chhunzawm a, Chawnpui pawhin a khat tawkin an nawr ve reng bawk. Khelmual a zim miau avangin goal chance a tam.

Minute 30-naah F. Lalrammuana'n ding lam aṭanga ṭha zeta a lakluh hnuin a cross ball chu Hriata'n ṭum hnih goal-ah a pet a, keeper John Lalruatfela'n ṭum hnih dang mah se a per chu Samuel Lawmsiamkima'n a pet goal, 1-1 a ni.

Goal dang hmuh tur a awm belh tawh a, goal pawm loh erawh a awm. Chawnpuiin Joseph Lalmuanawma hmangin hma an hruaiah an ngai a, an goal khung pawh an lawm zo ve tawh. Mahse, phyiso-in goalkeeper V. Lalthlamuanpuia a enkawl zawhah foul-ah a ngai leh zawk - Chawnpuiin pawm harsa an ti.

Second half-ah VL Thanga goal khung chu offside vangin pawm a ni lo a, hei erawh sawisel theih a ni lo. Electric Veng pawhin lungawi lohna tur an nei tho. Penalty ṭum hnih an beisei a, pakhat zawk chu handball ni mah se pek an ni lo.

Hun tawp thlengin an innawr tawn a, Electric Veng forward Remlalfaka'n chance ṭha bik a hlah a, Chawnpui pawhin hun ṭha an hmang ṭangkai lo. Electric Vengin point an hlawh chhuak ta a, inrintawkna an ngah phah sawt ang. Chawnpui erawhin point khat chauh an hmuh avangin match thumah point sarih hmuin pahnihnaah an lungawi a ngai a, Chanmari FC chu hmahruaitu thar an ni.