Osasuna mualah Barca an chak hram

Pathianni zan La Liga inkhelah Barcelona-in hnehna chang turin vanneihna an mamawh a, minute 85-naa Robert Lewandowski goal khung hmangin 2-1 in an chak hram.

Barca tan Jules Kounde chuan first half hun pek belhah goal hmahruai a khung a, Osasuna hian minute 76-naah Chily Avila hmangin an chhanglet - team pahnih hi point an insem mai a rinawm hman.

Mahse, minute 84-naah Barca-in penalty an hlawh chhuak a, Lewandowski chuan hei hi goal-ah chantirin an chak. Barca hian league match li aṭangin point 10 an nei ta a, tun season-ah an la tlawm lo.

Barcelona-in nipui transfer tawp nia free transfer-a an lakluh Joao Cancelo leh Joao Felix te chuan Catalan club tana an match hmasa ber an khel a, Athletic Bilbao aṭanga lakluh defender Inigo Martinez pawhin Barca tana a match hmasa ber a khel.

Beisei loh Kounde

Barcelona-in first half hun pek belhah goal hmahruai an khung a, goal khungtu hi goal khung uar lo ve tak defender Kounde a ni - season hmasaah khan match 40-ah goal khat a khung.

French defender hian Manchester City captain hlui Ilkay Gundogan corner pet aṭanga ball kal chu a tauh lut a, German midfielder-in Barcelona a pan hnua assist vawi hnih a neihna chiah a ni.

Mahse, mualneitu Osasuna tan Avila chuan minute 76-naah mawi zetin si phurh a sut a, Argentine forward-in chak mai inbeisei tawh Barcelona players leh ṭantute thinlungah hlauhthawnna a tuh.

Hello Lewy

Minute 80-naah pawh 1-1 a la ni a, Barca tan a harsa. Mahse, tun hnai lawka Xavi sawiseltu, attacking game an khelh tawk loh avanga goal khung a harsat thu sawitu Lewandowski chuan penalty a hlawh chhuak.

Osasuna centre back Alejandro Catena chu Lewy lakah hian a foul a, a tirah yellow card pek ni zet mah se, video assistant referee rawn a nih hnuah red card pek a ni a, penalty a chawi bawk.

Kum 35 mi Lewy chuan penalty hi goal-ah a chantir a, Barca chuan hei hi chak nan an hmang zui. Polish striker hian Barca league match hmasa pahnihah goal a khung lo a, league match hnuhnung pahnihah erawh goal a khung ve ve leh ta.

Barca mi thar

Catalan club tan minute 59-naah Cancelo chu bench aṭangin a lut a, August 2017-a Valencia tan a khelh hnua La Liga match a khelh leh hmasak ber a ni. Kum 29 mi Cancelo hian season hmasa kha Bayern Munich-ah loan-in a khel tawh a, Barca hi season tawp thleng atan loan-in a zawm.

Mahse, Manchester City fullback hian a ngheta Barca zawm theihna a contract-ah hian a ziak tel hran lo. Minute 80-naah Felix pawh bench aṭanga luhtir a ni a, Portuguese forward pawh hi season tawp thleng a khel dawn.

Felix hian season hmasa chawhnu lam kha loan-in Chelsea-ah a khel a, Barca a pan hma hian Atletico-ah kum 2029 thleng atan contract a pawtsei - hei hi a hlawh tihhniam nan leh, Barca-in player hlawha an sen theih zat a pelh loh nana tih niin an sawi.