Champion lai Iga Swiatek a tla

US Open hmeichhe champion lai Iga Swiatek chuan a nomawi a humhim thei dawn ta lo. Polish nula hian Jelena Ostapenko chu 3-6, 6-3, 6-1 in a ngam lo a, quarterfinal thleng zo loin last 16-ah a zinkawng a tawp.

Ostapenko a huaisen a, a ball vuak nat a hmang ṭangkai hle bawk - vawi 31 ngawt winners hlap chhuakin a khingpui a chaih buai hneh hle. French Open 2017 champion hian a match lehpekah chuan Coco Gauff-i a hmachhawn leh ang.

A chak loh avangin Swiatek chuan world number 1 a nihna a hloh dawn, chawlhkar 75 chhung teh meuh ranking sang ber a nih tawhna chu US Open zawh aṭangin Aryna Sabalenka-i'n a rawn nek chhuak dawn a ni.

Inkhel dangah Gauff chuan player ṭha Caroline Wozniacki chu 6-3, 3-6, 6-1 a hnehin quarterfinal a lut a, kum 16 mi Gauff hian a vawi khat nana Grand Slam title lak a tumna tihlawhtling turin vawi thum chak a la hmabak.