Chak zawn rei ber Verstappen

Max Verstappen chuan Formula 1 huang chhungah, a zawna intlansiak chak zawn rei ber record thar a siam. Red Bull driver hian Pathianni zana tlan zawh tak Italian Grand Prix-ah hnehna a chang leh a ni.

F1 season kal laiah Verstappen a kal fawr hle, inelna 14 an neih tawh zinga 12-ah a chak; tun hnaiah phei chuan a zawnin vawi 10 a chak hial. Record hmasa lo kawl tawhtu Sebastian Vettel chu a kalsan ta chiah a, a record hi a sawhnghet zel a nih pawhin a mak lo ang.

Dutch tlangval Verstappen hnungah hian a teammate Sergio Perez a thleng, tun season chu team dang tam hmun an kian ngai lo. Ferrari leh Mercedes driver palite chu an hnungah an intlar thung a ni.

Intlansiak hmabak pariat an la nei a, driver championship hmahruaitu Verstappen hian amah hnaih bertu Perez lakah point 145 tehmeuhin hma a hruai fal tawh. Thil mak danglam tak a thleng a nih ngawt loh chuan a zawna a vawi thum nan a champion ang.

Kum 25 mi Verstappen chuan, "Hetiang ang sulhnu ṭha hi a neih theih tih ka hria a, mahse ka nei ang tih hi ka ring phak miah lo. Car kan nei ṭha êm êm a, a ke (tyre) kan thlang dik ṭhin bawk," tiin a hnehna chan chu team thawhrah a ni tih a sawi.

September 17, Pathianni tlai dar 5:30-ah Singapore Grand Prix an tlan leh ang.